DILI, 26 agostu 2022 (TATOLI)–Prezidente Institutu Nasionál Seguransa Sosiál (INSS), Longuinhos Armando Leite, hateten pagamentu ba idozu no invalidéz iha munisípiu seluk finaliza hotu ona maibé munisípiu Viqueque mak seidauk konklui.
Notísia Relevante: Faze dahuluk ba pagamentu idozu-invalidéz hahú ho $50
“Progresu pagamentu ba ita-nia idozu no invalidéz, ita konklui hotu ona no munisípiu Viqueque mak seidauk hotu,” Longuinhos Armando Leite hateten ba Agência Tatoli, liuhosi telefónika, sesta ne’e.
Maibé, nia hatutan, pagamentu idozu no invalidéz ba munisípiu Viqueque ne’e sei konklui iha fulan ne’e nia rohan.
Lista idozu no invalidéz ba tinan 2022, liu-liu ba faze dahuluk nian ne’e ho benefisiáriu hamutuk 103.108 ho nia osan millaun $62, kompara ho tinan kotuk ne’e ema hamutuk 93.378 ho nia osan $17,172,040.
Dekretu-Lei Númeru 19/2008, 19 juñu, artigu 20 hateten subsídiu apoiu idozu no invalidéz iha tinan 2022 ne’e montante $50 kada fulan, ho nune’e tinan ne’e osan aumenta ba millaun $62.
Jornalista : Osória Marques
Editór : Cancio Ximenes
