iklan

EDUKASAUN, HEADLINE

Projetu komunitáriu iha eskola EBF tolu foin atinje 10%

Projetu komunitáriu iha eskola EBF tolu foin atinje 10%

Prosesu reabilitasaun Eskola EBF Hum-Boe, munisípiu Ermera, liuhosi projetu komunitáriu. Imajen/Espesiál

DILI, 26 agostu 2022 (TATOLI)–Projetu komunitária tolu iha eskola ensinu báziku filiál (EBF) Bobonaro no Viqueque foin atinje 8% to’o 10%.

Projetu komunitária rua iha Bobonaro iha EBF Odelgomo no Majop no EBF Webobo iha Viqueque.

Diretór Nasionál Dezenvolvimentu Parke Eskolár (DNDPE), Agostinho Soares, relata, eskola tolu iha munisípiu rua ne’e foin maka realiza projetu komunitáriu iha jullu fulan klaran ne’e tanba kauza hosi estrada.

“Ha’u haree iha momentu ne’ebé kondisaun ladi’ak duni, komunidade sai hotu hodi fó kontribuisaun boot hodi ajuda Governu lalin materiál sira ba eskola tolu ne’e, maibé kuaze fulan-rua nia laran hahú hosi maiu to’o juñu mak foin konklui,” Diretór informa iha ninia knaar fatin, MEJD, Vila Verde, sesta ne’e.

Notísia relevante: MEJD no ADN konkorda rezolve projetu komunitáriu

Maski nune’e, Diretór agradese tanba maski ho difikuldade ne’ebé iha, MEJD hamutuk ho komunidade bele rezolve dezafiu sira.

“Eskola tolu ne’e agora hahú ona prosesu reabilitasaun iha jullu-fulan klaran tanba bele ona asesu ba transporte, ne’ebé prosesu pagamentu ba faze dahuluk 25% rezolve ona ba eskola tolu ne’e. Enkuantu eskola tolu ne’e ninia progresu ba prosesu reabilitasaun ne’e atinje ona 8% to’o 10%, hanesan ema ne’ebé asume responsabilidade boot ne’e, fiar katak sira bele aselera prosesu reabilitasaun ne’e no fulan oin mai bele tama ona ba faze daruak,” nia akresenta.

Daudaun MEJD iha ona kompeténsia rasik atu halo pagamentu ba projetu komunitáriu ne’ebé maka realiza ba eskola sira iha territóriu nasionál

“Husu ba responsável projetu komunitáriu sira atu nafatin halo kontrola obra sira ne’e atubele hetan ninia kualidade. Tanba projetu sira ne’e molok atu hetan pagamentu, Ajénsia Dezenvolvimentu Nasional (ADN) sei uza ninia kompeténsia hodi halo verifikasaun ba progresu fíziku sira ne’ebé la’o iha eskola sira no bainhira verifikasaun ne’e laiha kualidade bele enfrenta problema,” nia tenik.

Jornalista   : Tomé Amado

Editora        : Julia Chatarina    

iklan
iklan

Leave a Reply

iklan
error: Content is protected !!