Autoridade Covalima realiza marsa saudavél komemora loron konsulta populár
COVALIMA, 29 agostu 2022 (TATOLI)–Autoridade Covalima hamutuk ho funsionáriu sira iha munisípiu Covalima realiza marsa saudavél hahu la’o ain iha resintu administrasaun Covalima to’o iha rotunda aldeia Tabakolot hodi komemora loron konsulta populár ba dala-XXIII (30 agostu 1999-30 agostu 2022).
Notísia Relevante: Covalima komemora konsulta populár ho kari aifunan iha monumentu Setembru Negro
“Ohin-ita hala’o marsa saudavél ho nia objetivu ita atu komemora loron konsulta populár ba dala-XXIII (30 agostu 1999-30 agostu 2022) hodi hanoin hikas iha momentu ne’eba saida mak akontese no situasaun momentu ne’eba, ohin-ita tuur hanoin atu deside Timor nia destinu,” Administradór Munisípiu Covalima, Francisco de Andrade hateten ba jornalista sira iha administrasaun Covalima, segunda ne’e.
Covalima foin dahuluk komemora loron konsulta populár hodi hala’o marsa saudavél ho nune’e partisipasaun funsionáriu sira ladún másimu tanba ema barak seidauk kompreende, tanba ne’e nia mós fó ona orinetasaun ba kargu xefia sira no husu funsionáriu sira hotu aban atu partisipa másimu isar bandeira hodi komemora loron konsulta populár iha munisípiu Covalima.
Hafoin serimónia ne’e, administradór sei rekolla lista prezensa funsionáriu sira nune’e bele hatene tuir funsionáriu sira-nia partisipasaun iha komemorasaun loron konsulta populár 30 agustu ba dala-23.
“Ita-atu hatene loloos ema-ne’ebé mak iha nasionalizmu ba rai ida-ne’e hotu-hotu tenke partisipa hafoin isar bandeira halo absensia hodi halo pasa revista ba funsionáriu sira-nia partisipasaun,” nia dehan.
Jornalista : Celestina Teles
Editor : Cancio Ximenes
