iklan

EKONOMIA, BOBONARO, HEADLINE, MUNISÍPIU

Governu sei konstrui moru protesaun  mota Biku-Fafuik iha fronteira Balibo 

Governu sei konstrui moru protesaun  mota Biku-Fafuik iha fronteira Balibo 

BOBONARO, 29 agostu 2022 (TATOLI)-Ministru Administrasaun Estatál, Miguel Perreira de Carvalho, promete Governu sei konstrui moru protesaun ba mota Biku iha suku Cowa ne’ebé liga ba mota Fafuik, suku Batugade, postu administrativu Balibo, munisípiu Bobonaro hodi proteje komunidade sira iha liña fronteira terrestre ne’ebé baliza ho Atambua, Belu, provínsia Nusa Tenggara Timur (NTT), Repúblika Indonézia.

Miguel Perreira hato’o promesa ne’e hafoin ho ekipa tékniku Programa Nasionál Dezenvolvimentu Suku (PNDS), Prezidente Autóridade Munisípiu Bobonaro, Ernesto de Oliveira Barreto no komandante Unidade Patrullamentu Fronteira (UPF), Superintendente Euclides Belo, observa direita mota hosi área Badut-mean to’o ba tasi, suku Batugade ne’ebé bee sobu beibeik bainhira akontese udan monu rai.

Notísia relevante: Balibo implementa atividade neen iha PMOPA faze dahuluk

“Ita presiza halo atendimentu urjente duni ba mota ida-ne’e, presiza halo protesaun. Ohin, ha’u hateten ona tékniku sira semana oin ne’e bele halo levantamentu, karik buat hotu tuir planu sei iha atendimentu urjente,” nia hateten iha intervensaun.

Governante ne’e enkoraja komunidade sira iha Batugade no Cowa, atu kontinua hametin pás no estabalidade iha liña fronteira nune’e bele fó biban ba komunidade lori dezenvolvimentu to’o baze.

“Ha’u husu ba ita-boot sira atu kontinua iha esperansa nafatin, labele lakon esperansa tanba ita hein kleur loos ona, kona-bá dezenvolvimentu atu mai iha ita-nia suku no hela fatin,” nia akresenta.

Xefe suku Batugade, postu administrativu Balibo, Janáario Moisés, esklarese Governu presiza halo duni intervensaun tanba área hirak-ne’e sai risku ba desastre naturál.

“Bee atu ba sorin la di’ak, entaun konsekuénsia mai fali ita, ita kria barreira ida iha ita-nia mota, atu labele kria inundasaun ba komunidade, liuliu ba Uma Kbiit Laek ne’ebé mak harii iha área fronteira tanba área ida-ne’e risku ba desastre moos,” nia sujere.

Tuir dadus monografia 2021, postu administrarivu Balibo iha aldeia 27, ho totál suku neen mak hanesan, Sanirin, Cowa, Leo-Lima, Leohitu, Balibo Vila no Batugade ho totál populasaun 19,869 no totál uma-Kain 4,708.

Notísia relevante: Governu presiza prioritiza estrada ligasaun Balibo-Batugade

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!