iklan

EKONOMIA, HEADLINE

Governu simu ona mákina pezadu hamutuk unidade 15

Governu simu ona mákina pezadu hamutuk unidade 15

Tékniku IGE, I.P halo simulasaun ekipamentu pezadu ne'ebé entrega ona hosi Auto Zone iha resintu IGE, Caicoli segunda (29/08). Imajen Tatoli/Francisco Sony

DILI, 29 agostu 2022 (TATOLI)—Primeiru-Ministru, Taur Matan Ruak, hamutuk ho membru Governu balun, segunda ne’e, ofisialmente simu mákina pezadu hamutuk unidade 15 hosi empreza internasionál Auto Zone, ne’ebé sosa hosi Governu liuhusi Ministériu Obra Publika (MOP) no IGE. I.P.

Diretór ADN, Renato Mariano Monteiro da Cruz, Primeiru-Ministru, Taur Matan Ruak no Prezidente Konsellu Administrasaun IGE, I.P, Ermenegilda da Costa Laurentina, simbolikamente tesi fita hodi inaugura ekipamentu pezadu foun ne’ebé entrega hosi Auto Zone, iha resintu IGE, segunda (29/08). Imajen Tatoli/Francisco Sony

Biban ne’e, Xefe Governu hato’o agradese ba serbisu Institutu Jestaun Ekipamentu, Institutu Públiku (IGE, I.P, sigla portugés), ne’ebé durante ne’e hala’o ona serbisu maka’as hodi ajuda komunidade.

“Ko’alia kona-ba mákina pezadu, dahuluk iha VIII Governu nian la autoriza institusiaun Estadu multiplika ekipamentu pezadu, ezemplu uluk Ministériu Agrikultura no Peska (MAP) sosa ninia ekipamentu rasik. Tinan ida-ne’e ha’u bandu atu MAP lalika sosa ekipamentu pezadu, instituisaun Estadu labele idaidak hola mákina pezadu maibé estabelese iha fatin ida de’it hanesan IGE, I.P, nune’e bainhira presiza bele uza, ha’u kontente loos ekipamentu pezadu iha tinan ida-ne’e halo serbisu maka’as, uza másimu rekursu ne’ebé ita hodi apoiu populasaun,” PM hateten iha Caicoli.

Notísia relevante: IGE, I.P simu pedidu hamutuk 411 loke estrada iha área rurál

Xefe Governu dehan, nia parte ladún preokupa ho ekipamentu pezadu bele fó retornu ba Governu, maibé oinsá mákina bele apoiu populasaun liuhosi loke dalan. Tanba ne’e, nia husu institutu públiku ho mákina ne’ebé iha atu apoiu nafatin komunidade iha área rurál ne’ebé presiza tulun.

“Ekipamentu pezadu nia funsaun la’os halo osan, maibé ajuda no hakma’an sidadaun sira ne’ebé presiza tulun ka serbisu iha sira-nia moris,” nia akresenta.

Prezidente Konsellu AdministrasaunIGE, I.P, Ermenegilda da Costa Laurentina. Imajen Tatoli/Francisco Sony

Iha biban hanensan, Prezidente Konsellu Adminnistrasaun IGE, I.P, Ermenegilda da Costa Laurentina, hateten, institutu ne’e estabelesidu bazeia ba dekretu lei 11/2006 ho nia respetivu no estutu rasik, ne’ebé iha nia papél rua importante hanesan halo poupansa ba orsamentu Estadu no buka reseita ba Estadu.

“Halo poupansa signifika prevene kustu irasionál sira no halo poupansa ba Estadu liuhosi apoiu loke estrada foun, halo manutensaun ba estrada rurál no halo normalizasaun mota sira iha tempu bailoron no udan. Rekolla reseita signifika fó aluga mákina ba setór privadu no individu sira ne’ebé fa’an produtu britadeira sira,” nia esplika.

Maski misaun rua ne’ebé lei hateten todan oituan, maibé IGE, I.P komprometidu halo esforsu nafatin hodi atinje projesaun sira tuir meta kada tinan.

Notísia relevante: MOP no IGE sei sosa tan mákina pezadu hamutuk unidade 15

“Esforsu lubuk ida mak ami halo ona maibé presiza mellora liután iha futuru, liuliu IGE, I.P bele atinje projesaun planeadu ho másimu iha tinan sira tuir mai atu serví ita-nia povu ho apoiu dezenvolvimentu infraestrutura iha rai ida-ne’e. kona-ba ekipamentu pezadu, IGE, I.P ne’ebé ohin empreza oferese ekipamentu, hetan apoiu másimu hosi Primeiru-Ministru, hahú kedas hosi planu to’o aprovasaun orsamentu ne’ebé nia prosesu rasik halo iha Komisaun Nasionál Aprovizionamentu (CNA, sigla portugés) ho nia durasaun fulan-neen resin,” nia dehan.

Aloka osan millaun $2

Montante orsamentu ne’ebé aloka hodi sosa mákina ne’e hamutuk millaun $2 no empreza manán ho nia valór kontratu milliaun $1,6 resin.

Aleinde ne’e, ekipamentu mákina pezadu ezistente hamutuk unidade 112, ne’ebé hosi númeru ne’e unidade 72 destakadu iha munisípiu sira inklui Dili, unidade 17 halo hela manutensaun no unidade 23 ho kondisaun a’at.

“Bele dehan IGE, I.P jere hela ekipamentu pezadu boot liu iha Timor-Leste kompara ho setór privadu sira, nune’e rekursu Governu nian ne’ebé IGE, I.P jere ekipamentu foun no tuan iha unidade 127. Ho mákina sira ne’ebé ezistente, ami konsege halo poupansa orsamentu hamutuk millaun $22,5 durante tinan-haat nia laran no tinan ne’e ami konsege ona halo poupansa orsamentu $900.000 resin, nune’e espera to’o dezembru ami bele poupa millaun $1 to’o millaun $1,5 resin,” nia otimista.

IGE, I.P durante tinan-haat konsege rekolla reseita millaun $1,5 resin liuhosi aluga mákina no fa’an britas, ba tinan ne’e konsege rekolla reseita $55.000 resin.

“Espera ho mákina unidade 15 foun ne’e bele ajuda mai hodi atinje ami-nia projesaun ba poupansa no reseita ne’ebé ami tau ona,” nia salienta.

Diretór empreza Auto Zone, Chen Youyu. Imajen Tatoli/Francisco Sony

Nune’e mós, Diretór empreza Auto Zone, Chen Youyu, hato’o agradese ba IGE, I.P tanba tau fiar tomak ba sira hodi sosa ekipamentu pezadu sira.

“Ekipamentu pezadu unidade 15 ne’ebé ohin oferese, tuir kontratu ekipamentu foun ne’ebé ami sosa sei forenese gratuita ba item manutensaun durante tinan-tolu tuir konkordánsia liuhosi kontratu no ami fó garantia tinan-ida,” nia hato’o.

Auto Zone nu’udar empreza internasionál ne’ebé estabelese iha Timor iha tinan 2015, ho ezisténsia durante tinan-hitu nia-laran konsege halo parseiru di’ak ho instituisaun Governu, embaixada inklui setór privadu sira.

“Ami espera katak ekipamentu ne’ebé ami oferese bele uza ho di’ak no fó benefísiu hotu ba futuru,” nia hateten.

Ekipamentu unidade 15 ne’ebé oferese mak hanesan Hydraulic esvadór unidade rua, hydraulic unidade rua, bachoe loader unidade ida, soil atabilizer unidade ida, pavement maintenance machine unidade ida, paver RP505/ aspal finisher unidade ida, vibrator roller unidade ida, mixer truck unidade ida, cleaning sweeper unidade ida, tlatbed trailer/tronton unidade ida, no seluk tan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!