DILI, 29 agostu 2022 (TATOLI)–Konstrusaun edifísiu foun eskola ensinu sekundáriu tékniku vokasionál Hera ne’ebé konstrui hosi empreza Timor Indusk, Unipesoal, Lda ho valór kontratu $199.119 atinje ona 20%.
Diretór Nasionál Dezenvolvimentu Parke Eskolár hosi Ministériu Edukasaun Juventude no Desportu (MEJD), Agostinho Soares, relata, konstrusaun edifísiu foun eskola ne’e kompostu hosi sala aula tolu, laboratóriu ida no eskritóriu ba profesór ida.
“Konstrusaun edifísiu foun realiza atu apoiu edifísiu seluk ne’ebé hetan ona estragu hosi udan no mota boot iha fulan hirak liu ba kotuk. Ita-nia Governu liuhosi MEJD deside halo fali konstrusaun edifísiu foun tanba eskola ne’e tama ona iha risku inundasaun ne’ebé kuaze edifísiu ida, ho sala aula tolu no hariis fatin ida maka mota sobu hotu ona,” Diretór hateten ba Agência Tatoli, via telefónika, segunda ne’e.
Notísia relevante: DNIE sujere MOP harii morru protesaun besik eskola iha Hera
Desizaun harii edifísiu foun ne’e atu apoiu eskola bele realiza filafali ensinu aprendizajen ho di’ak tanba daudaun ne’e estudante sira partisipa hela ensinu aprendizajen maibé ho semana sim semana não.
Enkuantu, relasiona ho edifísiu ho hariis fatin ne’ebé mota sobu ona, parte diresaun simu ona orientasaun hosi MEJD atu labele gasta tan osan halo reabilitasaun edifísiu tanba dezastre naturál ne’e laiha ema ida mak hatene.
“Ami simu ona orientasaun hosi Ministru, ne’ebé husu atu labele halo tan reabilitasaun ba edifísiu ne’ebé mota sobu ona tanba konstrusaun edifísiu foun sala tolu mós konstrui ona, husik ba kuandu barreira ka morru protesaun iha ona maka bele haree fali hodi halo reabilitasaun. Bainhira seidauk hetan apoiu hosi Ministériu Obra Públika (MOP) hodi halo normalizasaun ka konstrui barreira ba mota ne’e maka MEJD seidauk bele halo buat ida,” nia tenik.
Jornalista : Tomé Amado
Editora : Julia Chatarina
