DILI, 30 agostu 2022 (TATOLI)—Parlamentu Nasionál (PN), kuarta aban, sei diskute pedidu autorizasaun Prezidente Repúblika (PR), José Ramos Horta, atu vizita ba Austrália.
Notísia Relevante: PR Horta hato’o ona pedidu viajen rai-li’ur ba PN
Xefe Estadu hato’o karta pedidu ba PN hodi hetan konsentimentu ka autoriza atu vizita Austrália trata asuntu Estadu nian.
“Komisaun permanente reuniaun plenária aban (kuarta-feira 31/08), iha tuku 14h00 ajenda períodu orden do dia diskusaun no votasaun projetu rezolusaun númeru 101/V (4a) referente dezlokasaun Prezidente Repúblika ba Commonwealth Austrália,” refere ajenda PN ne’ebé Agência TATOLI asesu, tersa ne’e.
Iha ajenda, aban PN halo diskusaun no votasaun projetu rezolusaun númeru 102/V (4a) relativu partisipasaun ba dala-77 sesaun Assembleia Jerál Nasaun Unida iha Nova Iorque-Estadu Unidu Amérika (EUA).
Tuir Konstituisaun Repúblika Demokrátika Timor-Leste (KRDTL) iha artigu 95 (Kompeténsia Parlamentu Nasionál) iha númeru 3 “h” hateten katak Parlamentu Nasionál mak fó autorizasaun ba Prezidente Repúblika atu hala’o vizita Estadu nian.
Nune’e, tuir rejimentu Parlamentu Nasionál sei submete pedidu ne’e iha plenária hodi fó desizaun.
Antes ne’e, iha 12 jullu 2022, Parlamentu Nasionál liuhosi reuniaun plenária autoriza pedidu Prezidente Repúblika, José Ramos Horta, atu vizita Indonézia ho votu unanimidade a-favór 60, kontra no abstensaun 0.
Jornalista : Nelson de Sousa
Editór : Cancio Ximenes
