iklan

NASIONÁL, HEADLINE, POLÍTIKA

PR Horta hato’o ona pedidu viajen rai-li’ur ba PN

PR Horta hato’o ona pedidu viajen rai-li’ur ba PN

Prezidente Repúblika, José Ramos Horta. Imajen Tatoli/Francisco Sony

DILI, 30 agostu 2022 (TATOLI)—Prezidente Repúblika (PR), José Ramos Horta, hato’o ona pedidu autorizasaun viajen ba rai-li’ur ne’ebé sei akontese iha setembru tinan ida ne’e, ba Parlamentu Nasionál (PN).

“Ha’u haruka ona pedidu autorizasaun viajen ba Parlamentu semana ida liu ona. Ha’u husu autorizasaun viajen ba Austrália no Nova Iorke tanba ha’u tenke liu bá Asembleia Jerál ONU nian,” PR Horta hateten ba jornalista sira iha jardín 05 de maiu, Colmera, tersa ne’e.

Pedidu viajen ofisiál Xefe Estadu sei akontese iha loron 06 setembru tinan ida ne’e no bainhira to’o iha Austrália maka sei hala’o enkontru ho Primeiru-Ministru, Anthony Albanese, hafoin kontinua hasoru malu ho Ministru Negósiu Estranjeiru inklui sei hala’o atividade lubuk ida iha Canberra.

Notísia relevante: PR Horta hakarak sai mahon ba partidu polítiku sira

Nune’e mós, iha Sidney, sei halo mós vizita ba universidade balun hafoin liu kedan ba Darwin loron-ida no sei filafali mai Timor-Leste iha loron 12 setembru.

Iha sorin seluk, PR Horta mós informa ba públiku kona-ba ninia pedidu ne’ebé haruka ba Tribunál relasiona ho fundu veteranu.

“Ha’u laós husu ba Tribunál atu halo fiskalizasaun preventiva maibé husu opiniaun hosi Tribunál konsensionál kona-ba konstitusionalidade iha fundu veteranu,” nia akresenta.

Tuir PR, ida-ne’e hanesan esklaresimentu de’it tanba fundu ne’e liu ona no PR Horta momentu ne’ebá seidauk iha, tanba ne’e presiza opiniaun hosi Tribunál.

Jornalista   : Tomé Amado

Editora       : Julia Chatarina

iklan
iklan

Leave a Reply

iklan
error: Content is protected !!