DILI, 30 agostu 2022 (TATOLI)–Prezidente Repúblika (PR), José Ramos Horta, husu estudante timor-oan hotu iha rai-laran no rai-li’ur tenke hatene istória rai-laran tanba bainhira lahatene maka ninia kualidade edukasaun ladún di’ak.
“Se ita lahatene saida maka 28 novembru, 20 maiu, 30 agostu konsulta populár, ne’e ha’u hanoin problema boot. Estudante timor-oan maka lahatene loron istóriku sira ne’e signifika estudante ne’ebé mesak joven de’it ne’e mak baruk teen. Tanba daudaun ne’e mundu nakloke-an ona ho meiu oin-oin, iha facebook no rede sosiál barak loos, bainhira presiza bele asesu de’it,” PR Horta durante serimónia komemorasaun loron konsulta populár ba da-23, iha jardín 05 de maiu, Colmera, tersa ne’e.
Notísia relevante: PR Horta hakarak sai mahon ba partidu polítiku sira
Horta dehan, iha fulan ida-ne’e nia laran, Ministériu Administrasaun Estatál (MAE) hamutuk ho autoridade munisípiu Dili organiza atividade lubuk ida iha territóriu nasionál, tanba ne’e estudante sira tenke ativu hodi hatene istória.
“Atu sai sidadaun di’ak ne’ebé iha nasionalizmu no patriotizmu, dahuluk tenke hatene istória pasadu tanba saida maka Timor-Leste bele sai nasaun ida soberanu livre no independénsia, ne’e obrigasaun estudante sira-nian atu hatene,” nia fó hanoin.
Tanba ne’e, Xefe Estadu husu estudante atu badinas buka hatene tanba buat hotu prepara ona no iha fasilidade.
“La’ós de’it iha eskola maka bele hetan buat sira ne’e maibé iha mídia eletrónika sira prepara hotu ona, estudante sira hosi ensinu báziku siklu tolu mai to’o universidade tenke esforsu-an maka’as atu hatene uluk ninia istórika rasik,” nia akresenta.
Jornalista : Tomé Amado
Editora : Julia Chatarina
