iklan

BOBONARO, HEADLINE, MUNISÍPIU, POLÍTIKA

CCLN hahú verifika kandidatu kombatente na’in-148 iha Holsa

CCLN hahú verifika kandidatu kombatente na’in-148 iha Holsa

Konsellu Kombatente Libertasaun Nasionál hala'o verifikasaun ba dadus veteranu iha suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 31 agostu 2021 (TATOLI)-Konsellu Kombatente Libertasaun Nasionál (CCLN, sigla portugés) kuarta ne’e, halo abertura hodi hahú verifíka kandidatu kombatente libertasaun nasionál rejistadu 2009 hamutuk na’in-148 iha suku Holsa, postu administrativu Maliana, munisípiu Bobonaro.

Prezidente komisaun verifikasaun munisípiu Bobonaro, Jacinto Viegas Vicente ‘Roque’, esplika, prosesu verifikasaun kumpre de’it orientasaun Governu, maibé ekipa ne’ebé envolve iha komisaun verifikasaun sei serbisu ho tranparánsia tuir regra ne’ebé mak fó-sai ona.

Notísia relevante: Verifikasaun dadus veteranu rejistadu 2009 iha munisípiu haat seidauk konklui

“Atu hahú iha 2019 ami ba jura tiha iha Metinaro, ami 13 hamutuk ho nia reprezentante rejiaun sira hotu, zona ba jura iha Nicolau Lobato ho nia membru sira, tún to’o sira-ne’ebé ita soe hela no ekipa sira iha munisípiu mós ba jura hotu iha osoáriu hanesan mós imi, ne’ebé lalika ta’uk ida, imi jura atu hateten buat-ne’ebé loos, sé laloos karik sira iha-ne’ebá mak hatene,” nia hateten iha intervensaun.

Prosesu verifikasaun kandidatu sira sei lori sertidaun batizmu no kartaun eleitorál.

Enkuantu ba família mártir mós sei lori dukumentu komprovativu sira ne’e.

Hafoin ida-ne’e lori mós ho lilin ida, jura ba Bandeira Repúblika Demokrátika Timor- Leste (RDTL) no FALINTIL, tau hamutuk ho foto saudozu sira-ne’ebé mate ona.

Veteranu ne’e husu ba kandidatu sira atu uza ropa ho disiplina no dignidade, labele tau kalsa badak no hemu lanu tanba sei hasai fotografia no halo mós gravasaun vídeu atu konta loloos idak-idak nia kontribuisaun ba prosesu luta libertasaun nasionál hahú hosi 1975 to’o 1999.

Prezidente konsellu veteranu munisípiu Bobonaro, Jaime dos Santos Romão ‘Dotim’, apela ba kandidatu sira atu konta istória loloos nune’e Estadu bele rekoñese hodi selu direitu ba pensaun.

“Ha’u atu dehan de’it ida-ne’e tempu ikus verifikasaun, ne’ebé hato’o loloos, imi kaer kilat karik hahú hosi ne’ebé no sá tinan, atubele valoriza imi-nia grau, maibé buat hotu depende ba imi-nia istória, mak foin lori imi ba hetan direitu pensaun,” nia fundamenta.

Sorin seluk, Sekretáriu Autoridade Munisípiu Bobonaro, João Fátima do Carmo, agradese ba Estadu no Governu tanba fó ona oportunidade atu halo verifikasaun ba kombatente no grupu rezisténsira sira-ne’ebé uluk sakfifikq nia-an hodi fó kontribuisaun ba ukun rasik-aan.

“Ita-boot sira-nia luta, partisipasaun no kontribuisaun maka oan ami ohin loron bele hamriik hanesan líder munisípiu, tanba ne’e nafatin korajen ba veteranu no kombatente sira katak, importante mak asegura dadus sira-ne’e ho klaru no loloos, nune’e Estadu bele rekoñese ita-boot sira-nia partisipasaun luta,” nia fó hanoin.

Xefe suku Holsa,postu administrativu Maliana, António Santa Cruz, agradese ba ekipa verifikasaun tanba durante tinan barak ona kandidatu kombatente sira hein hela.

Santa Cruz informa, kandidatu ne’ebé atu tama verifikasaun 148 ne’e kompostu hosi mártir 12 no kombatente 136, maibé iha kombatente barak mak seidauk rejistu iha 2003 no 2009.

“Ha’u hein katak depois verifikasaun ida ne’e sei fó oportunidade ba sira-ne’ebé seidauk rejistu tanba sira-ne’e barak liu 148, inklui ida mak atan ha’u rasik,bne’ebé karik ba oin bele tán fó biban mai ami,” nia husu.

Partisipa iha atividade ne’e Komandante PNTL munisípiu Bobonaro, Superintendente Polísia Antóninho Mau-Luta, administrador postu administrativu Maliana, Tomás Laco-Loe, veteranus sira, xefe suku hitu iha postu administrativu Maliana no família mártir sira.

Notísia relevante: Verifikasaun dadus veteranu rejistadu 2009 atinje ona 62%

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!