Verifikasaun dadus veteranu rejistadu 2009 iha munisípiu haat seidauk konklui

DILI, 26 jullu 2022 (TATOLI)—Sekretáriu Estadu Asuntu Kombatente Libertasaun Nasionál (SEAKLN), Júlio da Conceição ‘Loro Mesak’, hateten verifikasaun dadus veteranu rejistadu tinan 2009 nian sei falta munisípiu haat (4) mak seidauk konklui.

Notísia Relevante: MAKLN sei konklui verifikasaun dadus veteranu rejistadu 2009 iha Manatuto-Liquiça

“Verifikasaun dadus veteranu rejistadu tinan 2009 nian sei falta munisípiu Ainaro, Bobonaro, Baucau no Ermera mak seidauk konklui,” Loro Mesak hateten ba Agência TATOLI, iha nia knar fatin Caicoli, Dili, tersa ne’e.

Nia informa, verifikasaun dadus veteranu iha munisípiu sira-ne’ebé konklui ona mak Munisípiu Dili, Aileu, Manufahi, Lautém, Liquiça, Manatuto, Rejiaun Administrativa Espesiál Oé-cusse Ambeno (RAEOA), Viqueque no Cavalima mak iha 30 jullu agora ne’e konklui ona,” Loro Mesak hateten ba Agência TATOLI, iha nia kna’ar fatin Caicoli, Dili, tersa ne’e.

Governante ne’e hateten, iha prosesu verifikasaun ne’e ekipa verifikadór nasionál hasoru dezafiu oiin tanba liga ho dokumentu ema barak mak halo tuir nia hakarak.

“Kuandu veteranu sira mai rejistu halo ita ulun moras tanba mai konta istória ne’ebé oioin de’it, maibé dala barak la tuir ninia servisu ne’ebé durante nia kontribui. Entaun ida-ne’e sai dezáfiu ida ba ita hodi ita tenke fera ulun,” nia dehan.

Tanba, tuir nia, mekanizmu verifikasaun ba dadus veteranu rejistadu tinan 2009 la hanesan ho veteranu rejistadu 2003 no 2005, tanba uluk bainhira Komisaun Omenajen entrevista no Komisaun rekomenda kedas katak ida-ne’e 8-14 no ida-ne’ebá ne’e 4-7.

“Maibé, agora ita ba foti dadus depois na’in deklara tiha no dadus sira-ne’e lori mai Nasionál depois ami bolu fali komponente kompañia sira mak tuur hamutuk hodi deside,” Loro Mesak hateten.

Nia informa, veteranu iha territótiu nasionál ne’ebé mak rejistu iha tinan 2009 no sei halo verifikasaun ne’e hamutuk 124.680.

Liuhosi konteúdu ne’ebé mensiona iha Estatutu Kombatente Libertasaun Nasionál, Lei númeru 3/2006, no artigu 13 ° “Registo da Qualidade de Combatente da Libertação Nacional ” sei kontinua hala’o validasaun rejistu ba períodu daruak nian ba rekoñesimentu hanesan Kombatente Libertasaun Nasionál ne’ebé rejista iha tinan 2009.

Notísia Relevante: Verifikasaun dadus veteranu rejistadu 2009 atinje ona 62%

Jornalista : Osória Marques

Editór       : Cancio Ximenes