Covalima selebra loron konsulta populár ho isár bandeira
COVALIMA, 30 agostu 2022 (TATOLI)–Autoridade Covalima hamutuk ho funsionáriu sira iha munisípiu Covalima realiza serimónia isar bandeira hodi komemora loron konsulta populár ba dala-XXIII (30 agostu 1999-30 agostu 2022).
Notísia Relevante: Covalima komemora konsulta populár ho kari aifunan iha monumentu Setembru Negro
“Ohin ita komemora loron konsulta populár 30 agostu ba dala-XXIII ita realiza serimónia isár bandeira hodi komemora loron konsulta populár ne’ebé hotu-hotu hatudu identidade Covalima hodi uza tais no kaibauk,” Administradór Munisípiu Covalima, Francisco de Andrade, hateten liuhosi diskursu iha resintu AMC Covalima, tersa ne’e.
Timor leste ohin loron hetan independénsia ne’ebé mai hanesan de’it milagre maibé liuhosi prosesu ne’ebé naruk hahú hotu 1975 to’o mai iha 1999 ema hotu fakar raan halo ema barak sai oan-ki’ak no faluk tanba Timor hakarak ukun rasik an.
“Iha luta ita independente ba iha igreja ema hotu hatene padre na’in-tolu mate atu salva povu nia vida ho nune’e ida-ne’e manan independénsia tuir ita-nia kultura ba oin ida-ne’e sai hanesan tradisaun ema Covalima,” nia dehan.
Ho nune’e, autoridade Covalima husu ba funsionáriu sira sai ezemplár hodi hatudu nasionalizmu no patriotizmu ba povu sira iha Covalima.
Tuir observasaun Agencia tatoli iha terenu hafoin finaliza serimónia isár bandeira iha resintu administrasaun Covalima, diretór hosi instituisaun sira foti lista prenzensa hodi buka hatene funsionáriu sira-ne’ebé partisipa no la partisipa iha seriomónia isár bandeira.
Antes ne’e, atu komemora loron konsulta populár autoridade Covalima realiza atividade sira hanesan halo limpeza jerál iha fatin públiku realiza marsa saudavél.
Jornalista : Celestina Teles
Editór : Cancio Ximenes
