iklan

HEADLINE, MUNISÍPIU, VIQUEQUE

Ekipa levantamentu dadus rai no propriedade iha Beaço finaliza atividade

Ekipa levantamentu dadus rai no propriedade iha Beaço finaliza atividade

Plaka atividade ekipa interministeriál no ekipa task force ba levantamentu rai no propriedade iha área dezignadu planta LNG Beaço, suku Maluro, kuarta (31/08). Imajen Tatoli/Vitorino Lopes da Costa

VIQUEQUE, 31 agostu 2022 (TATOLI)-Xefe Koodenadór ekipa task force no atuál xefe suku Maluro, Francisco Amaral, hateten, ekipa interministeriál no ekipa task force ba levantamentu rai no propriedade iha área dezignadu planta LNG Beaço iha rai ektare 574,  kuarta ne’e, finaliza ona atividade.

“Ami finaliza ona levantamentu rai no propriendade iha área dezignadu Beaço ne’ebé la’o ho susesu, maibé la’ós dehan ramata ona, maibé ninia kontinuasaun sei iha tanba sei halo publikasaun no komunidade ne’ebé seidauk halo levantamentu bele halo filafali levantamentu,” Xefe Koodenadór informa ba Agência Tatoli, iha sede suku Maluro, postu administrativu Viqueque Vila, munisípiu Viqueque.

Ekipa sira serbisu durante loron-20 no konsege konklui serbisu, maibé komunidade nia rai ne’ebé iha planta mak seidauk sukat.

“Komunidade afetadu sira ne’ebé maka ninia rai no planta seidauk sukat no sura planta karik ida-ne’e ita sei iha tempu, nune’e ami husu komunidade bele hakat mai iha sede suku hodi hetan informasaun ne’ebé klaru,” nia akresenta.

Notísia relevante: Levantamentu rai no proriedade iha Beaço kuaze konklui

Maski prosesu levantamentu rai no propriedade mosu dezentendementu no balun iha disputa rai, maibé ekipa sira konsege rezolve ho di’ak durante atividade.

Tuir  dadus uma kain afetadu ba planta LNG hosi suku Maluru kompostu hosi aldeia  Maluro totál uma kain hamutuk 115, aldeia Maka-Losa totál uma kain hamutuk 65 no aldeia Loho-Oan totál uma kain hamutuk 113 totál afetadu iha area Beaço hamutuk uma kain 293 no totál abitante hosi suku Maluro totál hamutuk na’in-1.167 no uma-lisan totál hamutuk 34

Suku Uma-uain Leten aldeia rua ne’ebé hela iha Beaço hanesan aldeia Makaleku uma-kain hamutuk 164 no aldeia Kailoibere totál uma-kain hamutuk 99.

Jornalista   : Vitorino Lopes da Costa

 Editora       : Julia Chatarina

iklan
iklan

Leave a Reply

iklan
error: Content is protected !!