DILI, 31 agostu 2022 (TATOLI)–Universidade Nasionál Timor-Lorosa’e (UNTL), kuarta ne’e, realiza ona serimónia graduasaun ba estudante finalista hamutuk 627 hosi fakuldade hitu, ne’ebé eventu ne’e fahe ba parte dadeer no lorokraik.
Reitór UNTL, João Soares Martins, relata, serimónia parte dadeer realiza ona ba estudante finalista hamutuk 313, kompostu hosi fakuldade tolu hanesan Enjeñaria Siénsia no Teknolojia, Medisina no Siénsia Saúde no Siénsia Sosiál, enkuantu parte lorokraik realiza ba estudante finalista hamutuk 314 ne’ebé kompostu hosi fakuldade Edukasaun Arte no Umanidade, Ekonomia no Jestaun inklui Fakuldade Filozofia.
“Tinan ne’e iha fulan agostu ikus ne’e ita konsege realiza graduasaun ba estudante hamutuk 627 hosi fakuldade hitu. Ita-nia serimónia fahe ba parte dadeer no lorokraik atubele iha espasu ba bainaka sira ne’ebé ita konvida atu asiste graduasaun ne’e,” Reitór hateten iha Sentru Konvensaun Dili (CCD, sigla portugés).
Notísia relevante: UNTL sei gradua estudante finalista 627 iha fulan-agostu
Finalista ne’ebé graduá kompostu hosi fakuldade Agrikultura hamutuk 57, Enjeñaria Siénsia no Teknolojia iha 90, Medisina no Siénsia Saúde iha 74, Siénsia Sosiál iha 92, Edukasaun Arte no Umanidade iha 258, Ekonomia no Jestaun iha 34 inklui Filozofia iha 22.
Nune’e mós, Ministru Ensinu Superior Siénsia no Kultura, Longuinhos dos Santos, hateten, graduasaun ne’ebé ohin estudante finalista simu ona atu motiva nafatin sira hodi bele kontinua formasaun tuir mai iha pos-graduasaun, nune’e bele aumenta kapasidade hodi kompete iha kampu traballu.
“Ha’u haree sira mesak joven de’it, tanba ne’e ha’u iha esperansa boot atu graduadu sira ne’e bele kontinua liután sira formasaun tuir mai iha área pos-graduasaun atu-bele manán esperiénsia hodi bele kompete iha kampu traballu iha futuru,” nia fó hanoin.
Jornalista : Tomé Amado
Editora : Julia Chatarina
