DILI, 31 agostu 2022 (TATOLI)—Grupu Kulturál hosi suku Nahareka, tuir planu iha segunda (05/09) ne’e sei simu eminénsia reverendisima Kardeál Don Virgilio do Carmo da Silva, SDB, ho dansa tradisionál iha aeroportu internasionál Prezidente Repúblika Nicolau Lobato, Comoro, Dili.
Kardeal Virgilio do Carmo da Silva ho ninia ekipa sei to’o iha Aeroportu ho aviaun Euro Atlantico iha tuku 06h00 dadeersan.
Notísia Relevante: Kardeál Virgílio: “Ksolok ne’e la’ós ba ha’u maibé ba igreja no povu TL”
“Ha’u hanoin komisaun organizadora deside grupu Kulturál hosi suku Nahareka nian tanba ho razaun suku ida-ne’e mak Kardeál nia suku orijen. Komisaun organizadora hakarak fó oportunidade ba grupu ne’e hodi hatudu sira-nia kultura iha kapitál no kontinua kedas konferénsia imprensa iha salaun aeroportu internasonál Comoro,” Prezidente Komisaun Organizadora, Guilhermino da Silva, ba Agência Tatoli iha salaun Arkidioseze Lecidere.
Bainhira konferénsia imprensa termina, Kardeál foun ho populasaun, padre, madre no lider órgaun soberania hotu-hotu sei ba hamutuk iha Katedrál atu simu bensaun hosi Kardeál no sei iha diskursu hosi Prezidente Repúblika, José Ramos Horta.
Karik sarani sira hosi dioseze Baucau no Maliana sei partisipa iha serimónia simu Kardeál no misa agradesimentu ba Kardeál foun ne’e, nia hatán , Konferénsia Episkopál inklui ona responsável sira hosi dioseze rua ne’e ba komisaun organizadora atu organiza di’ak liután sarani sira mai simu Kardeál foun.
“Ha’u hanoin totál pesoa hosi kada dioseze rua ne’e mak 4.000, ne’e 2.000 hosi Baucau no 2.000 hosi Bobonaro. Maibé mós la taka dalan ba sira seluk atu bele partisipa direta,” nia dehan.
Entretantu, preparasaun fatin hodi selebra misa agradesimentu ba Kardeál foun iha Tasi-Tolu ne’e, atinje ona 70%.
Notísia Relevante: Don Virgílio do Carmo da Silva, Kardeál dahuluk Uma Kreda Timor-Leste
Vise-Koordenadora Jerál ba serimónia simu Kardeál foun, Maria Gorrete, hateten tuir proposta hosi Konferensia Episkopál Timorense hato’o ba iha Governu atu apoia serbisu sira iha parte protokolu, seguransa, saúde, lojístika no konsumu.
Tanba ne’e, Primeiru-Ministru dezigna Ministru da Administrasaun Estatál, Miguel Pereira de Carvalho, hanesan reprezentante espesiál iha komisaun konjunta atu fó apoiu ba serimónia hodi simu Kardeál iha 05 setembru iha aeroportu internasionál Prezidente Nicolau Lobato, Comoro no misa agradesimentu ne’ebé tuir planu sei realiza iha Tasi-Tolu iha loron 06 setembru.
Daudaun ne’e, Konferénsia Episkopál Timorense ho Governu liuhosi reprezentante konjunta ne’ebé mak iha hahú distribui ona konvite ba iha konvidadu sira, serbisu lojístika nian iha parte Tasi-Tolu nian hanesan tenda, kadeira no sound system.
Eminénsia Reverendisima Kardeál Don Virgílio do Carmo da Silva, SDB, moris iha suku Uato Haco, postu administrativu Venilale, munisipiu Baucau iha loron 27 novembru 1967. Kardeál nu’udar ai-fuan domin hosi inan-aman, José do Carmo da Silva no Isabel da Silva. Nia aman José do Carmo da Silva hosi Maurate, suku Nahareka, postu administrative Ossu, Munisípiu Viqueque, jerasaun hosi Ibare, Ossu no Watume, suku Wailili, Baucau.
Nune’e mós nia inan Isabel hosi Bibiela, Uai-toki, suku Bahamori, Venilale, jerasaun hosi Dero-Hoó, suku Uma Ana Ico no Kama-Hoó, suku Bahamori nian. Nia aman nia atividade loro-loron mak hanesan enfermeiru pekuária no nia inan hanesan inan ne’ebé fó tempu tomak haree nia oan sira.
Eminénsia Reverendisima Kardeál Virgílio do Carmo da Silva, SDB, iha maun-alin hamutuk nain-neen (6). Hirak ne’e mak hanesan (1) Manuel Jucelino do Carmo da Silva, (2) Virgílio do Carmo da Silva, (3) José Lucas do Carmo da Silva, (4) Gualdinho do Carmo da Silva, (5) Pe. Gui do Carmo da Silva, SDB no (6) dr. Nilton do Carmo da Silva.
Notísia Relevante: Papa Francisco realiza misa agradesimentu ba kardeál na’in-21
Jornalista : Osoria Marques
Editór : Cancio Ximenes
