MESSK garante estudante timor-oan 130 sei fila kontinua estudu iha Xina
DILI, 31 agostu 2022 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, garante estudante timor-oan hamutuk 130 sei filafali ba kontinua estudu iha Xina.
“Ha’u garante katak tempu besik ita-nia estudante sira ne’ebé hetan bolsa estudu hosi Governu Xina sei filafali ba kontinua estudu tanba Prezidente Repúblika rasik promulga ona dekretu-lei,” Ministru hateten hafoin ramata serimónia graduasaun Universidade Nasionál Timor-Lorosa’e (UNTL), iha Sentru Konvensaun Dili (CCD, sigla portugés), kuarta ne’e.
Dekretu-lei ne’ebé promulga ona kona-ba medida apoiu dezlokasaun estudante timor-oan iha ensinu superiór ba estranjeiru hodi filafali mai Timor ka atu sai ba estranjeiru iha situasaun pandemia, epidemia dezastre naturál ka katástrofe, moras todan ka konflitu armadu.
Notísia relevante: MESSK sei prepara orsamentu ba estudante Xina 126
Tuir Ministru, daudaun sira tama ona iha prosesu rekolla dadus estudante, ne’ebé dadus sira ne’e sei mai hosi Embaixada Xina atu nune’e bainhira finaliza MESSK bele prevee ona orsamentu ba estudante sira.
“Ita sei prepara orsamentu $100.000 maibé kuandu la sufisiente ita sei halo filafali proposta ba Ministériu Finansa hodi husu aumenta tan orsamentu atu nune’e ita-nia estudante sira bele dezloka ona ba Xina hodi hala’o estudu,” nia tenik.
Estudante timor-oan hamutuk 130 ne’ebé eskola iha Xina hetan bolsa estudu hosi program Governu Xina liuhosi Embaixada iha Timor-Leste, ne’ebé estudante balun fila mai Timor tanba razaun COVID-19, balun pasa feira no renova pasaporte.
“Estudante sira ne’e seidauk bele filafali kontinua estudu iha Xina tanba Governu nasaun Xina husu sira atu selu rasik kustu ba kuarentena. Maibé estudante sira ne’e laiha kbiit atu responde kestaun ne’e, tanba ne’e sira husu ba Governu Timor-Leste atu apoiu asuntu ida-ne’e,” nia salienta.
Jornalista : Tomé Amado
Editora : Julia Chatarina
