DILI, 31 agostu 2022 (TATOLI)—Parlamentu Nasionál (PN), kuarta ne’e, liuhosi reuniaun plenária komisaun permanente autoriza pedidu Prezidente Repúblika (PR), José Ramos Horta, atu ba vizita Austrália no Estadu Unidu Amérika (EUA).
Notísia Relevante: Aban, PN diskute pedidu autorizasaun PR Horta vizita Austrália
Pedidu Xefe Estadu nian iha rua mak hanesan projetu rezolusaun númeru 101/V(4a) refere dezlokasaun PR ba Commonwealt Austrália no projetu rezolusaun númeru 102/V(4a) relativu ho partisipasaun iha sesaun ba dala-77, sesaun asembleia jerál Nasaun Unida iha Nova Iorke-Estadu Unidu Amérika (EUA).
Deputadu komisaun permanente halo votasaun kada pedidu ho rezultadu hanesan ho votu a-favór-26, kontra no abstensaun 0.
“Nune’e, Parlamentu Nasionál liuhosi komisaun permanente fó ona konsentimentu ba viajen Prezidente Repúblika ba Commonwealt Austrália no vizita ba Estadu Unidu Amérika-Nova Iorke atu partisipa iha asembleia jerál Nasaun Unida ho enkontru sira seluk relasiona ho asembleia jerál Nasaun Unida nian,” Prezidente Parlamentu Nasionál, Aniceto Longuinhos Guterres Lopes, informa iha reuniaun plenária PN.
Tuir termu efeitu númeru 1 artigu 80, no alínea ‘h’ númeru 3 artigu 95 Konstituisaun Repúblika Demokrátika Timor-Leste (KRDTL) meiu ne’e PR solisita ba PN hodi fó konsetimentu deslokasaun Xefe Estadu nian Vizita Estadu.
Vizita Estadu ba Austrália iha loron 03-11 setembru 2022, konvite hosi Governadór Jerál Austrália, David Hurley.
Partisipasaun PR iha sesasaun dala-77 asembleia jerál Nasaun Unida iha simeira altu nivél Xefe Estadu organiza hosi G7+, no iha reuniaun altu nivél komisaun ‘Peace building’ Nasaun Unida, iha 21-30 setembru 2022, iha Nova Iorke, Estadu Unidu Amérika (EUA).
Jornalista : Nelson de Sousa
Editór : Cancio Ximenes
