VIQUEQUE, 31 agostu 2022 (TATOLI)—Postu saúde Macadique, postu administrstivu Uatulari, munisípiu Viqueque daudaun ne’e menus ai-moruk ferrous sulfate ka ai-moruk aumenta ran ba inan isin-rua.
“Ami-nia stock ai-moruk ferrous sulfate ba inan isin-rua mamuk hahú hosi fulan-janeiru to’o maiu, nune’e inan isin-rua sira la simu, hafoin liu fulan-maiu mak sira foin lori mai maibé sira fó 200 resin. Tanba ne’e agora stock ai-moruk ne’e menus liu,” Parteira postu saúde Macadique, Juleta da Silva, hateten ba Agência Tatoli, iha postu saúde Macadique, kuarta ne’e.
Tuir parteira ne’e, hosi Ministériu Saúde (MS) hateten, kada inan isin-rua tenke simu ai-moruk ferrous sulfate tablet 90 maibé realidade iha postu saúde labele atinje tanba stock menus.
“Entaun, bainhira inan isin-rua hamutuk 15, entaun na’in-ida hetan ai-moruk 15 de’it. Tanba ne’e ami sente ladún di’ak ba inan isin-rua sira. Durante ne’e ami husu ba sentru saúde Uatulari maibé stock ai-moruk ne’e laiha no iha munisípiu mós hateten ba ami katak seidauk iha,” nia akresenta.
Notísia relevante: MAE inaugura postu saúde Macadique
Nune’e, nia husu ba Ministériu Saúde atu distribui ai-moruk ba munisípiu Viqueque hodi bele distribui ba postu sira hodi fahe ba inan isin-rua.
“Ami hato’o ona relatóriu katak menus ai-moruk maibé to’o agora seidauk distribui ba postu saúde sira. Aleinde ne’e, iha postu saúde Macadique menus fasilidade meza partu ba inan isin-rua, tanba ne’e parte saúde sira presiza fó apoiu,” nia tenik.
Jornalista : Vitorino Lopes da Costa
Editora : Julia Chatarina
