DILI, 31 agostu 2022 (TATOLI)–Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, informa, Timor-Leste sei sai membru Asosiasaun Nasaun Sudeste Aziátiku (ASEAN, sigla inglés) ofisialmente iha tinan oin 2023.
“Ho ekipa ASEAN no mós asesoria tékniku hosi Banku Dezenvolvimentu Aziátiku (ADB, sigla inglés) hodi esplika ba Primeiru-Ministru kona-ba preparasaun tékniku tenke halo hodi bele prepara-an di’ak liután kuandu fim tinan ne’e ASEAN anúnsia ona katak ita atu sai membru no mós desizaun formál sei akontese iha tinan oin,” Ministra Adaljiza Albertina, informa hafoin hasoru Primeiru-Ministru, Taur Matan Ruak, iha Rezidénsia Farol, kuarta ne’e.
Notísia relevante: https://tatoli.tl/2022/08/05/pm-simu-notisia-timor-leste-iha-kondisaun-tinan-oin-tama-asean/
Serbisu ne’e sei envolve liña ministeriál sira, hanesan tenke rekruta tan rekrusu umanu no aprova lejizlasaun balun.
“Ita-nia esforsu sira nee fó mensajen ida ba país membru ASEAN katak ita halo ona esforsu hafoin sira anúnsia katak sira hakarak Timor-Leste bele ona sai membru iha tinan 2023. Ida-ne’e maka promesa ne’ebé nasaun membru sira hateten, ha’u repete de’it, pur ezemplu Primeiru-Ministru Cambodia nian ne’ebé maka lidera hela ASEAN, tanba daudaun Cambodia mak sai prezidénsia rotativa asosiasaun nian, ne’ebé sira rasik hateten katak anúnsia Timor-Leste ninia adezaun tinan ne’e iha siméria ne’ebé sei hala’o iha novembru 2022, hafoin sira espera katak se buat hotu la’o di’ak sira hakarak Timor-Leste sai ona membru iha tinan oin,” nia esplika.
Desizaun ne’e tanba haree ba rezultadu Fact Finding Mission no Sekretariadu ASEAN, ne’ebé haree katak Timor-Leste esforsu duni, tanba ne’e sira laiha ona objesaun ne’e mak Primeiru-Minsitru Cambodia deklara iha públiku katak sira espera Timor-Leste sai membru iha tinan oin.
“Primeiru-Ministru husu atu halo ajustamentu balun tan, liuliu planu aprezenta lejizlasaun sira ne’ebé mak ita tenki hadi’a hodi armoniza ho lejizlasaun ASEAN nian,” membru ezekutivu ne’e tenik.
Timor-Leste hato’o pedidu adezaun ba ASEAN hahú hosi tinan 2011 maibé to’o ohin loron seidauk konsege adere ba asosiasaun.
MNEK kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun.
Aleinde ne’e, halo mós elaborasaun dokumentu Rejime Komérsiu Externu no enkuadramentu legál sira.
ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.
Maski Timor-Leste daudaun ne’e seidauk adere ba ASEAN, maibé partisipa ona eventu balun ho nasaun membru sira.
Jornalista : Antónia Gusmão
Editora : Julia Chatarina
