DILI, 30 agostu 2022 (TATOLI)- Diretór Departamentu Pensaun no Subrevivente Ministériu Asuntu Kombatente Libertasaun Nasionál (MAKLN), Manuel Araújo dos Santo, hateten verifikasaun ba dadus veteranu rejistadu tinan 2009 nian to’o ohin loron atinje ona 78%.
Notísia Relevante: Verifikasaun dadus veteranu rejistadu 2009 atinje ona 62%
“Ami bele hateten to’o agora ita atinje ona 78% ho nia ekivalensia ho kuaze 88.000,” Manuel hateten ba Agência Tatoli, iha nia kna’ar fatin Caicoli, Dili, kuarta ne’e.
Númeru ne’e kobre ba territóriu nasionál no hela Munisípiu Bobonaro, Baucau no Ermera mak seidauk konklui, maibé atu tama ba setembru ne’e tékniku sira haree movimentasaun iha munisípiu sira, eintermu lojístika, transporte, finansa.
“Tuir kalendáriu ne’ebé iha setembru ita konklui tan Bobonaro nian depois iha outubru Ermera no ikus mak Baucau. Munisípiu tolu ne’e ho populasaun ne’ebé barak maibé sei konklui hotu iha tinan ne’e,” nia dehan.
Veteranu sira iha territórriu nasionál ne’ebé rejistadu iha tinan 2009 ne’e hamutuk ema na’in – 124,680.
Liuhosi konteúdu ne’ebé mensiona iha Estatutu Kombatente Libertasaun Nasionál, lei númeru 3/2006, no artigu 13 hateten ” Registo da Qualidade de Combatente da Libertação Nacional ” sei kontinua hala’o validasaun rejistu ba períodu daruak nian ba rekoñesimentu hanesan Kombatente Libertasaun Nasionál ne’ebé rejista iha tinan 2009.
Jornalista : Osória Marques
Editór : Cancio Ximenes
