iklan

NASIONÁL, KAPITÁL

AMD hein Prezidente Komisaun muda vendedór ambulante ba Golgota Mall

AMD hein Prezidente Komisaun muda vendedór ambulante ba Golgota Mall

Polísia kaer no baku vendedór ambulante na’in-rua (2) tanba kontra regra PAM Dili nian hodi faan modo-tahan iha estrada públiku iha Kampung Baru, Comoro, sesta (07/1/2022). Imajen TATOLI/António Daciparu.

DILI, 01 setembru 2022 (TATOLI)—Diretór Servisu Munisipál Jestaun Merkadu no Turizmu, Arthur Henriques, informa Autoridade Munisípiu Dili, liuhosi Servisu Munisipál Jestaun Merkadu no Turizmu, dadaun hein hela Prezidente Komisaun aluga Golgota Mall hodi muda vendedór ambulante Kampung Baru.

Notísia Relevante: AMD sei muda vendedór ambulante Kampung Baru ba Golgota Mall

“Atu muda ita-nia vendedór Kampung Baru ba Golgota Mall nia prosesu la’o hela, agora hein de’it Prezidente Komisaun ne’ebé lídera hosi ema Indonézia, tanba sira mak aluga hela Golgota ne’e. Se nia mai, ami sei tuur hamutuk iha akordu ami sei asina nota entendimentu atu nia konkorda. Ami prontu organiza ona vendedór sira ba iha ne’ebá (Golgota Mall). Purtantu, agora ami hein hela tanba prosesu hotu la’o ona, maibé hein de’it úniku atu asina akordu ida entre Jerente Golgota Mall ho ema ne’ebé aluga Golgota Mall,” Arthur Henriques hateten ba Agência Tatoli, iha nia knar fatin, Dili, kinta ne’e.

Kona-ba fahe billete ba vendedór sira atu hatene sira-nia (Balkaun) fatin, nia esplika, ba fahe billete Autoridade Munusípiu Dili liuhosi Servisu Munisipál Jestaun Merkadu no Turizmu fahe hotu ona tuir númeru balkaun.

“Billete ba vendedór ami fahe hotu ona tuir númeru balkaun, tanba hosi númeru balkaun ne’e mak ami sei koloka sira ba,” nia dehan.

Tanba, balkaun iha Golgota Mall ne’e Servisu Munisipál Jestaun Merkadu no Turizmu revista hamutuk 197.

“Maibé, ita-nia billete ami fahe 147, tanba la inklui obralan sira. Se tuir obralan mak hamutuk 191. Entaun, ho ita-nia billete restu ne’e daudaun ami tau hela, tanba restu ne’e kuaze obralan hotu. Tanba, obralan ema loja (toko) na’in Golgota Mall la simu, tanba sira mós faan roupa no sapatu,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!