iklan

EDUKASAUN, HEADLINE

Governu prevee fundu millaun $4,5 ba konstrusaun fíziku IPB

Governu prevee fundu millaun $4,5 ba konstrusaun fíziku IPB

Ministru Ensinu Superiór Siénsia no Kultura, Longuinhos dos Santos. Imajen Tatoli/Egas Cristóvão

DILI, 01 setembru 2022 (TATOLI)–Governu prevee ona fundu ho montante $4.540.000 atu realiza prosesu konstrusaun fíziku Instituisaun Politékniku Betano (IPB) faze dahuluk, ne’ebé ezekuta hosi empreza Chonking Internasionál Construction Cooperation hosi Xina.

“Ita selebra ona kontratu ho empreza manan-na’in ne’e tanba hetan ona avaliasaun hosiKomisaun Nasionál Aprovizionamentu (CNA, sigla portugés), ne’ebé kontratu ne’e ita halo ba faze dahuluk. Orsamentu ne’ebé ita prevee maihosi Governu ho montante millaun $4.540.000,” Ministru Ensinu Superior Siénsia no Kultura (MESSK) Longuinhos dos Santos, hateten iha salaun MESSK, Colmera, kinta ne’e.

Notísia relevante: IPB hetan pakote fiskál millaun $1,2 ba tinan 2023

Maski Governu prepara ona fundu ho montante millaun $4,5 ba konstrusaun faze dahuluk, maibé empreza manan-na’in ne’e mai ho ninia estimasaun orsamentu $3.961.658.

Orsamentu ba faze dahuluk ne’e tuir planu sei realiza konstrusaun ba morru, estrada inklui verba seluk iha IPB nia laran ba tinan ida, hahú hosi fulan ne’ebé realiza ona serimónia tau fatuk dahuluk, hafoin ba faze daruak maka sei hahú konstrusaun ba edifísiu sala aula no biblioteka sira.

Planu konstrusaun IPB ne’e maihosi referénsia planu dezenvolvimentu nasionál (PDN) ne’ebé hahú hosi munisípiu Lautém, Manatuto, Manufahi no Covalima, ne’ebé konstrusaun ne’e sei hahú no sei sai referénsia ba instituisaun politékniku sira seluk.

Prosesu faze dahuluk ba IPB ne’e rasik sei realiza iha fulan-setembru liuhosi serimónia tau fatuk dahuluk ne’ebé sei lansa hosi Primeiru-Ministru, Taur Matan Ruak, hodi nune’e bele garante konstrusaun ne’e bazeia ba dezeñu.

Jornalista   : Tomé Amado

Editora       : Julia Chatarina

iklan
iklan

Leave a Reply

iklan
error: Content is protected !!