iklan

COVALIMA, POLÍTIKA

Komunidade suku Raimea seidauk simu Cesta Bázika

Komunidade suku Raimea seidauk simu Cesta Bázika

Xefe suku Raimea, Januario Gomes Nahak. Imajen Tatoli/Celestina Teles.

COVALIMA, 01 setembru 2022 (TATOLI)—Xefe suku Raimea, postu administrativu Zumalai, munisípiu Covalima, Januario Gomes Nahak informa, maske komunidade uha suku sira seluk simu ona Cesta Bázika maibé to’o ohin loron komunidade Raimea seidauk simu Cesta Bázika.

“Ha’u mós lahatene razaun saida mak ami sai hanesan komunidade suku Raimea seidauk simu cesta bázika, tanba komunidade suku sira seluk simu hotu ona maibé komunidade suku Raimea seidauk simu,” Januario Gomes Nahak hateten ba Agência Tatoli iha merkadu Suai, Debos, kinta ne’e.

Postu Administrativu Zumalai ho nia luan área 283,74 kilometru kúbiku kompostu hosi suku ualu (8) hanesan suku Fatuleto, Lepo, Lour, Mape, Usekai, Tashilin, Zulo ne’ebé simu ona cesta bázika maibé komunidade suku Raimea seidauk simu.

Razaun tanba saida mak suku sira seluk simu no suku Raimea seidauk simu cesta bázika la hatene no bainhira mak atu simu fali mós nu’udar xefe suku la hetan ka seidauk hetan informasaun kona-ba asuntu ne’e.

Suku Raimea iha aldeia sira hanesan Loro, Beilako Uma Laran no Oebaba ho nia xefe família hamutuk 2.520.

Administradór munisípiu Covalima, Francisco de Andrade esplika, programa cesta bázika ne’e, Sekretáriu Estadu Kooperativa mak halo lansamentu iha suku Zulo iha momentu ne’eba kompañia hato’o kedas preokupasaun.

“Lansamentu cesta bázika ba faze dahuluk iha postu Zumalai iha momentu ne’eba kompañia lamenta iha postu Zumalai, suku hitu mak simu ona maibé suku Raimea mak seidauk. Ida-ne’e Sekretáriu Estadu Kooperativa mak hatene, ita lahatene nia prosesu,” nia hateten.

Maske komuniade iha postu Zumalai, iha suku hitu mak simu ona cesta bázika hosi Governu no hela deit suku Raimea mak seidauk simu, ida-ne’e sedu ka tarde sira sei hetan hotu sira-nia direitu nu’udar komunidade iha postu administrativu Zumalai.

Antes ne’e, iha loron 5 fulan-agostu tinan 2022 Governu liuhosi Sekretáriu Estadu  kooperativa hala’o lansamentu cesta bázika faze daruak iha suku Zulo, postu administrativu Zumalai, munisípiu Covalima.

Notísia Relevante: Governu lansa distribuisaun Cesta Bázika faze daruak ba benefisiáriu 15,161 iha Zulo

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!