VIQUEQUE, 01 setembru 2022 (TATOLI)—Ministériu Administrasaun Estatál (MAE) sei halo koordenasaun ho autoridade lokál ba implementasaun Programa Nasionál Dezenvolvimentu Suku (PNDS) ne’ebé atu tama iha suku Maluro, postu administrativu Viqueque Vila, munisípiu Viqueque.
“Ha’u hakarak hato’o ba komunidade suku Maluro katak iha área sira ne’ebé afetadu, ita sei halo planu no koordena ho autoridade lokál, sekretariu tékniku PNDS katak ita halo programa dezenvolvimentu rurál liuhosi programa PNDS ne’e ita tenke garante programa hetan susesu. Entaun área sira ne’ebé afetadu planta LNG ita labele halo konstrusaun, maibé iha suku Maluro iha fatin balun la afetadu ne’e bele realiza programa sira hanesan uma kbiit laek (UKL) no distribuisaun kalen ba komunidade ba programa UKL+ B,” Ministru Administrasaun Estatál, (MAE), Miguel Pereira de Carvalho, hateten hafoin ramata enserra atividade levantamentu dadus rai no propriedade iha Beaço, suku Maluro, kinta ne’e.
Aleinde ne’e, Governu iha ona planu atu realoka komunidade afetadu ba planta LNG, tanba iha área Beaço halo ona levantamentu dadus rai no propriedade no hein Governu foti dezisaun hodi fó indemnizasaun.
“Governu liuhosi PNDS sei la konstrui uma kibit laek no distribui kalen iha área afetadu. Tanba bainhira ita halo mak tinan oin tenke mobiliza fali ita-nia komunidade ba área foun, entaun ita-nia investimentu laiha valór. Ha’u ko’alia ona ho xefe suku Maluro no xefe suku Uma-uain Leten tanba programa sira ne’e komunidade nia diretu. Entaun ami sei esforsu hodi ko’alia ho autoridade sira, maibé ba komunidade ne’ebé afetadu sei la hetan enkuantu ba la afetadu sira sei distribui,” nia akresenta.
Notísia relevante: Kondisaun klima no estrada difikulta konstrusaun UKL iha Viqueque
Iha fatin seluk, Xefe suku Maluro, Francisco Amaral, haktuir, programa PNDS ba implementasaun UKL no distriubisaun materiál kalen ba komunidade suku Maluro tanba planu planta LNG atu implementa iha Beaço. Nune’e bainhira komunidade muda ona ba uma foun mak implementa programa sira iha suku Maluro.
“Tinan ne’e labele implementa UKL no distribuisaun materiál kalen ba komunidade iha suku Maluro tanba rai sira identifikadu ona atu kria planta LNG. Ho ida-ne’e autoridade sente triste tanba komunidade ne’ebé sai benefisiáriu programa, agora sira labele hetan,” Autoridade suku Maluro tenik.
Suku Maluro identifika ona komunidade atu hetan materiál UKL+ B ho benifísiariu 30 no UKL regulár.
“Ha’u lahatene loos bainhira maka muda sai komunidade no to’o agora fatin foun mós seidauk hamoos. Governu sentrál seidauk fó garante ba ami katak bainhira maka atu muda komunidade iha suku Maluro,” nia tenik.
Jornalista : Vitorino Lopes da Costa
Editora : Julia Chatarina
