iklan

HEADLINE, MUNISÍPIU, VIQUEQUE

Uma-kain 200 resin iha suku macadique seidauk asesu eletrisidade no bee-moos

Uma-kain 200 resin iha suku macadique seidauk asesu eletrisidade no bee-moos

Bee-moos. Imajen/Espesiál

VIQUEQUE, 01 setembru 2022 (TATOLI)—Uma-kain 200 resin iha suku Macadique, postu administrativu Uatulari, munisípiu Viqueque, hahú hosi tempu okupasaun Indonézia to’o ukun-an, seidauk asesu eletrisidade no bee-moos.

“Suku Macadique iha uma-kain 200 resin iha aldeia neen maka to’o ohin loron seidauk asesu ahi eletrisidade no bee-moos. Komunidade hela besik iha foho Matebian ne’ebá,” Xefe suku Macadique, Afonso dos Reis, hateten ba Agência Tatoli iha suku Macadique, kinta ne’e.

Suku Macadique iha totál aldeia 21, ne’ebé hosi númeru ne’e iha aldeia 15 mak asesu ona eletrisidade no bee-moos.

“Aldeia neen ne’ebé seidauk iha eletrisidade no bee-moos, hasoru difikuldade tanba estrada liga ba aldeia ne’e a’at. Foin lalais ILO mak halo estrada maibé seidauk hatene to’o agora halo hotu ona ka seidauk,” nia akresenta.

 Notísia relevante: MOP inaugura liña eletrisidade iha suku rua Manufahi

Nia konsidera, populasaun iha área remota bainhira bele moris di’ak tenke asesu estrada, eletrisidade no bee-moos, maibé bainhira seidauk asesu maka populasaun sei moris iha kotuk hela.

Aleinde ne’e, kondisaun estrada difikulta populasaun iha aldeia neen lori produtu agríkola ba merkadu hodi fa’an.

“Dalan ladiak sira labele lori produtu ba fa’an tanba distánsia uma bá merkadu dook,” Líder komunitáriu ne’e haktuir.

Nune’e, nia husu ba Governu hodi tau-atensaun fasilita nesesidade hirak ne’e ba populasaun iha área rurál nune’e sira bele moris di’ak.

Suku Macadique iha aldeia hamutuk 21, ho populasaun hamutuk 7.482 kompostu hosi mane 3.852 no feto 3.630, hosi uma-kain 1.773.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!