iklan

EDUKASAUN, DILI, HEADLINE

UNTL fó tempu fulan-18 ba estudante inativu 17.509 halo inskrisaun

UNTL fó tempu fulan-18 ba estudante inativu 17.509 halo inskrisaun

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

DILI, 01 setembru 2022 (TATOLI)-Estrutura Universidade Nasionál Timor-Lorosa’e (UNTL) fó ona tempu durante fulan-18, hahú hosi loron 01 setembru 2022 to’o 28 fevereiru 2024 ba estudante inativu 17.509 atu halo inskrisaun hodi kontinua estudu.

“Kuandu estudante identifikadu ne’e hakarak kontinua filafali, UNTL sei fó tempu ba sira durante fulan-18, maibé kuandu tama ona marsu 2024 konsidera dropout (DO) ona. Sira tenke hato’o pedidu mai reitoria, hafoin retoria rasik halo koordenasaun ho fakuldade ba kursu ne’ebé maka sira hili. Tanba ne’e, ha’u apela ba antigu alunu ka estudante inativu sira sei hakarak filafali mai UNTL atu kontinua hikas kursu bele halo pedidu mai reitoria, nune’e universidade bele regulariza sira-nia situasaun,” Reitór UNTL, João Soares Martins, hateten liuhosi konferénsia imprensa ne’ebé hala’o iha sala’o vídiu konferénsia UNTL, kinta ne’e.

Notísia relevante: Estudante finalista UNTL 627 simu graduasaun

UNTL rasik durante ne’e iha regulamentu ne’ebé hatuur ona iha artigu 10 versaun 2013, ne’ebé hateten prosedimentu kona-ba implementa rejime pre-inskrisaun ka DO fixu ona.

Ba kursu baxarelatu másimu tinan-tolu, hafoin fó tan tinan-rua, maibé bainhira estudante ida la konsege termina ninia estudu tuir tempu ne’ebé termina maka sei implementa rejime pre-inskrisaun, nune’e mós ba lisensiatura, tinan-haat, bainhira la termina tuir tempu, maka UNTL fó tan semestre rua, maibé la konsege nafatin foin aplika rejime DO.

“Ita seidauk implementa rejime ne’e tanba ita mós iha sentimentu, tanba ne’e ita sei tolera malu. Maibé ha’u hanoin UNTL mós to’o ona momentu ida-ne’e tenke duni aplika ona regra ida ne’e. Tanba ne’e, ba tinan oin (2023) ita hahú aplika ona regra ba estudante foun sira,” nia akresenta.

Tuir Reitór, parte universidade foin identifika estudante 17.509 iha tinan 2021, ne’ebé sira ne’e maka durante ne’e mai halo rejistu formál hafoin lakon paradeiru.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!