Veteranu Bobonaro nia oan 20 sai benefisiáriu subsídiu $500
BOBONARO, 01 outubru 2022 (TATOLI)-Sekretáriu Ezekutivu Konsellu Kombatente Libertasaun Nasionál (CCLN, sigla portugés), munisípiu Bobonaro, Moisés Ramos, hateten veteranu Bobonaro nia oan hamutuk na’in-20 sai benefisiáriu ba subsídiu hosi governu liuhosi Servisu Auditoria Gabinete Apoia Sosiedade Sívil (SAAGAS), Primeiru Ministru ho montante $500 hodi hala’o estudu iha universidade ba tinan akadémika 2022.
Nia haktuir, estudante ne’ebé selesionadu maioria hosi veteranu grau ho dedikasaun 03 ho 4-7 mai hosi postu administrativu sira no kapitál Maliana.
Notísia relevante: Veteranu Bobonaro husu Governu harii edifísiu própriu
“Ami hetan deit na’in-20, ba sira-ne’ebé hahú tama universidade no besik finaliza universidade, kada ema ida $500, ne’e mós prosesu ona parese ke semana ida tán sira bele levanta ona liuhosi Grupu ida,” nia informa ba Jornalista sira iha kna’ar-fatin, Maliana, kinta ne’e.
Moisés akresenta, apoia subsídiu ne’e CCLN munisípiu Bobonaro rasik mak halo proposta ba SAAGAS tanba veteranu ho dedikasaun 03 la hetan pensaun , no 4 a 7 hetan de’it dala ida, ne’e duni sira-nia oan menus liu ba eskola iha universidade privada sira.
Enkuantu kandidatu hirak-ne’e prienxe on kritéria ho deklarasaun komprovativu sira hanesan, deklarasaun valór anteriór no matríkula ba tinan letivu foun nian nune’e bele uza orsamentu ne’e ba tinan ida tomak.
“Subsídiu ne’e sei iha prosesu nia laran no grupu ne’e asina ona kontratu ho SAAGAS iha loron 25 fulan-jullu, subsídiu ne’e la fó kada semestre maibe fó dala ida de’it,” nia hateten.
Entretantu CCLN munisípiu Bobonaro mós Taka sai ona naran veteranu nia-oan 100 kompostu hosi ensinu báziku na’in-10, ensinu sekundáriu 10, ensinu sekundáriuriu jerál 10 no ensinu superiór na’in-700 ne’ebé mak selesionadu pasa hodi sai benefisiáriu bolsa estudu ne’ebé oferese hosi Ministériu ba Asuntu Kombatente Libertasaun Nasionál (MAKLN).
Notísia relevante: Konsellu Veteranu Bobonaro husu komunidade nafatin selebra loron veteranu
Jornalista: Sérgio da Cruz
Editór: Evaristo Soares Martins
