iklan

BOBONARO, HEADLINE, IMAJEN, MUNISÍPIU, POLÍTIKA, SOSIEDADE SIVĺL

Veteranu Bobonaro husu Governu harii edifísiu própriu

Veteranu Bobonaro husu Governu harii edifísiu própriu

Vise Prezidente Konsellu Veteranu Munisípiu Bobonaro Lúcio Dinis Marques ‘Onsar’. Imajen Tatoli/Sérgio da Cruz.

BOBONARO, 26 abríl 2022 (TATOLI) – Vise Prezidente Konsellu Veteranu Munisípiu Bobonaro, Lúcio Dinis Marques ‘Onsar’, husu Ministériu ba Asuntu Kombatente Libertasaun Nasionál (MKALN) harii edifísiu própriu hodi halo atendimentu ba veteranu sira.

Nia hato’o preokupasaun ne’e banihira enkontru ho Sekretáriu Estadu Asuntu Kombatente Libertasaun Nasionál (SEAKLN), Júlio da Conceiçao ‘Loro-Mesak, iha edifísiu provizóriu konsellu veteranu munisípiu Bobonaro, tersa ne’e.

“Ami husu mak ne’e atu araska oinsá mós edifísiu kombantente munisípiu presiza konstrui foun, entaun ministru tenke hasai osan prepara fatin ba kombatente, sé lae prezidente autoridade munisípiu dada tiha fatin ne’e, ami ba loos ne’ebé, situasaun ida-ne’e ami hanesan na’in ba independénsia, reuniaun fali iha ai-hún ida-ne’e sente susar la halimar,” nia hateten iha intervensaun.

Nia dehan, antes ne’e konsellu veteranu munisipál sukat ona rai iha área Soso, postu administrativu Maliana, maibé orsamentu ne’ebé governu prevee hatama fali ba kofre estadu.

Nia agradese Prezidente autoridade Munisípiu Bobonaro sesante, Jeferino Soares, ne’ebé entrega fatin mamuk ba konsellu veteranu munisípiu hodi halo atendimentu ba veteran sira.

Hatán ba preokupasaun ne’e, Sekretáriu Estadu ba Asuntu Kombatente Libertasaun Nasionál, Júlio da Conceiçao ‘Loro-Mesak’, preukupa kondisaun ne’e tanba ne’e sei aprezenta ba Ministru Asuntu Kombatente Libertasaun Nasionál Julio Sarmento da Costa ‘Meta-Malik’.

“Ha’u hatene uluk ita iha $100 mill dollar ba kada munisípiu, maibé ita la halo, sai to’o osan ne’e ba se ita la hatene, ne’ebé ita hotu hein ami ko’alia took mak ha’u sei fó fali informasaun. Ne’ebé hakarak ka lakohi hau sei debate ho ministru atu hari sede foun,” nia promete.

Papél hosi Ministériu ba Asuntu Kombatente Libertasaun Nasionál (MAKLN) nu’udar departamentu governamentál ho misaun koñese, ezekuta, koordena no avalia polítika, ne’ebé define ona no aprova hosi Konsellu Ministrru iha asuntu Kombatente Libertasaun Nasionál (Artigo 1º do Decreto-Lei n.º 19/2018, de 27 de dezembro).

Nune’e, proposta orsamentu tinan fiskál 2022 ne’ebé propoin hosi Ministériu ba Asuntu Kombatente Libertasaun Nasionál ho montante $99.684.114 (millaun $99-resin) ne’ebé koloka ba saláriu no vensimentu $ 731.126, bens (sasán) no servisu $ 3.580.128, kapitál menór $103.200, transferénsia públika $92.659.660 no kapitál dezennvolvimentu $2.610.000.

Montante orsamentu ne’e sei finansia  programa rua (2), sub-programa neen (6) no atividade hamutuk 11 inklui montante $92,659,660 destinada ba pagamentu pensaun kombatente libertasaun nasionál liuhosi kategoria transferénsia públika.

Hosi montante orsamentu $99.684.114 (millaun $99-resin) ne’e koloka ba programa ho kódigu 510 kona-ba boa governasaun no jestaun institusionál sei gasta $2,438,701 (millaun $2-resin) no programa ho kódigu 980 kona-ba igualdade jéneru no inkluzaun sosiál ho despeza $97,245,413 (millaun $97-resin).

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!