Covalima sei realiza “tocha da pás” komemora masakre Setembru Negro 1999
COVALIMA, 02 setembru 2022 (TATOLI)—Vise-Prezidente Komisaun Organizadora, Maria Carvalho Amarál (Bui kiak) hateten, daudaun ne’e komisaun organizadora halo preparasaun atu realiza atividade ‘tocha da pás’ (ahi-knulu dame) no misa agredesimentu hodi komemora Masakre Setembru Negro ba dala-XXIII (06 setembru 1999-06 setembru 2022).
Notísia Relevante: Masakre Setembru Negro nia hun mai hosi 26 fevereiru 1999
“Ami-nia preparasaun hahú kedas fulan jullu to’o ohin loron (02 setembru) programa ne’ebé ami atu hala’o mak hanesan iha loron 05 setembru sei realiza atividade tocha da pás no iha loron 06 setembru sei realiza misa agrdesimentu. Hafoin misa sei tau ai-funan iha monumentu masakre setembru negro,” Maria Carvalho Amarál (Bui kiak) hateten ba Agência Tatoli, iha monumentu Setembru Negro, sesta ne’e.
Razaun komisaun organizadora realiza tocha da pás ne’e, tanba monumentu masakre setembru negro hanesan loron istóriku no loron importante ba Covalima-oan liuhosi atividade tocha da pás ne’e atu bele relembra saida mak akontese iha tinan 23 liubá ne’e.
Tocha da pás ne’e la’o-ain hahú hosi auto-estrada suku Ogues to’o mai iha Igreja Ave Maria Suai, nune’e husu ba sobrevivente, família matebian no Covalima-oan atu bele partisipa atividade durante loron rua ne’e.
Notísia Relevante: Kovalima Konsidera Padre Nain Tolu Eroi Boot
Iha 05 setembru hafoin hala’o tocha da pás, kalan sei hala’o atividade reflesaun ne’ebé dirije hosi padre Klaritianu Jesuita mak sei mai loke reflesaun ne’ebé sei konvida sobrevivente na’in-lima (5) sei konta istória pasadu 06 setembru 1999.
Iha 06 setembru ne’e sei realiza misa agrdesimentu no hafoin misa sei tau kari ai-funan iha monumentu Masakre Setembru Negro 1999.
Atividade ne’ebé mak atu realiza hodi komemora masakre Setembru Negro ne’e prepara hosi komisaun organizadora, maibé antes ne’e komisaun sira hala’o uluk enkontru ho administradór Covalima, veteran, igreja sai hanesan konsilleiru ba eventu ne’e.
Komisaun realiza atividade toca da pás no misa hodi selebre masakre setembru negro hetan kontribuisaun hosi parte hotu-hotu hanesan Governu, veteranu sobrevivente, komapañia sira no seluk tán.
Notísia Relevante: Setembru Negro, mate-isin butuk iha igreja oin hanesan foho oan ida
Jornalista : Celestina Teles
Editór : Cancio Ximenes
