Governu sei deside Misaun Xefe Unidade apoia resenseamentu eleitorál iha Guiné-Bissau
DILI, 02 setembru 2022 (TATOLI)–Membru Misaun Esploratoria Apoia Prosesu Rejistu Eleitorál iha Guiné-Bisau no Diretor Jerál Sekretariadu Tékniku Administrasaun Eleitorál (STAE), Acilino Manuel Branco, hateten Governu sei deside Misaun Xefe Unidade atu apoia prosesu resensiamentu eleitorál iha Guiné-Bissau iha tinan 2022.
Notísia Relevante: Governu aprova kriasaun misaun apoiu prosesu resensiamentu eleitorál Guiné-Bissau
“Ami espera katak instituisaun rua, Ministru Negósiu Estranjeiru no kooperasaun (MNEC) ho Administrasaun Estatál (MAE) ne’ebé estabelese ona orden nomeasaun iha lideransa Unidade nian atu hala’o sira-nia kna’ar tuir Dekretu-Lei Governu Númeru 23/2022 atu apoia peosesu resensiamentu eleitorál iha Guiné-Bissau,” Membru Misaun Esploratoria Apoia Prosesu Rejistu Eleitorál iha Guiné-Bisau, Diretor-Jeral Sekretariadu tékniku Administrasaun eleitorál (STAE), acilino Manuel Branco, ba Tatoli, iha ninia servisu fatin Caicoli, Dili, sesta ne’e.
Nia hateten, nia laiha kompeténsia atu pronúnsia matéria Unidade Misaun nian hodi apoia prosesu resensiamentu eleitorál Guine-Bissau iha tinan 2022.
Maibé tuir lei, diretór no asisténte ida mak sei lidera kargu diretór no pozisaun Xefe STAE nian ba iha Guiné-Bissau.
Ministru na’in-rua ne’e sei nomea sira na’in-rua atu xefia kargu sira iha tempu badak ho objetivu atu prepara kondisaun hotu-hotu no hahú iha Guine-Bissau.
“Hafoin nomeasaun ne’e ramata, pozisaun rua ne’ebé lidera ne’e sei rekruta elementu sira atu haforsa servisu iha misaun ne’e,” nia dehan.
Husu mós kona-ba tipu apoiu Governu nian ba eleisaun Guine-Bissau nian, ofisiál ne’e sei fó asisténsia téknika no promove formasaun no kapasitasaun rekursu umanu sira-nian ba órgaun Administrasaun eleitorál Guine-Bissau nian, ba Planeamentu, organizasaun no ezekusaun Sensu nian, prosesu eleitorál ne’e entrega ekipamentu sira ba prosesu rejistu nian inklui espozisaun lista sira no seluk tán.
Ekipa ne’e sei ramata ninia serbisu iha loron 15 fulan-novembru tinan ida-ne’e, tanba Estadu Timor-Leste sei hala’o eleisaun parlamentár iha tinan oin mai.
“Eleisaun Guine-Bissau nian sei hala’o iha loron 18 fulan-dezembru tinan ne’e,” nia esplika.
Tuir dekretu Governu númeru 23 / 2022, iha publikasaun jornál da Republica, artigu 5 ko’alia kona-ba organizasaun ne’ebé hakerek iha artigu ida-ne’e Diretór ida mak dirije, asiste hosi Vise-Diretora ne’ebé mak atende nia iha nia aujénsia no impedimentu iha territóriu Repúblika Guiné-Bisau nian.
Asistente Diretór ierarkia subordinadu ba Diretór, aleinde ne’e Diretór no vise sira hetan nomeasaun hosi Diretór no Diretór sira hosi Sekretariadu tékniku Administrasaun eleitorál nian, ho orden hosi membru Governu ne’ebé responsavél ba polítika esterna no kooperasaun internasionál ho proposta hosi membru Governu ne’ebé tutela hosi Administrasaun Estatál.
Jornalista : Osória Marques
Editór : Cancio Ximenes
