Idozu besik 7.000 uza ona kartaun ATM hosi BNCTL
DILI, 02 setembru 2022 (TATOLI)—Banku Nasionál Komérsiu Timor-Leste (BNCTL, sigla portugés), tinan ne’e, atribui ona kartaun Automatic Teller Machine (ATM) ba idozu sira besik 7.000 iha territóriu laran tomak.
“BNCTL oferese ATM ba idozu sira ho objetivu fasilita bainhira osan tama sira foti de’it ona, la presiza hein oráriu BNCTL ba selu iha suku,” Diretór Ezekutivu BNCTL, Brígido de Sousa, informa ba Agência Tatoli, iha ninia knaar fatin, Mandarin, sesta ne’e.
Bainhira subsídiu idozu nia tama, iha benefisiáriu barak iha Liquiçá mak foti osan ona iha mákina ATM.
“Ami enkoraja idozu sira bele uza hotu kartaun ATM, maski iha difikuldade hanesan sira la hatene uza tanba mesak ferik no katuas, maibé família hanesan oan no bei-oan bele ajuda foti sira-nia osan,” nia fó hanoin.
Notísia relevante: Faze dahuluk ba pagamentu idozu-invalidéz hahú ho $50
Tuir Diretór Ezekutivu, BNCTL la’os atu halo kontrola hodi idozu sira labele fó kartaun ba família uza.
“Idozu sira ne’e bainhira mate, família foti nafatin osan, tanba osan tama nafatin, maibé ida ne’e la’ós kulpa BNCTL nian,” nia akresenta.
Lista pagamentu mai hosi Institutu Nasionál seguransa Sosiál (INSS) no BNCTL halo transferénsia ba idozu sira-nia konta bankária.
“Agora responsabilidade INSS ni Ministériu Solidaridade Sosiál no Inkluzaun (MSSI) atu haree ema ne’e moris ka lae, tanba BNCTL ne’e ajénsia ba pagamentu no laiha direitu atu husu ema simu osan ka lae,” nia tenik.
Jornalista : Arminda Fonseca
Editora : Julia Chatarina
