iklan

HEADLINE, SEGURANSA

Komandu PNTL hahú forma ekipa investiga kazu joven ida mate iha sela detensaun

Komandu PNTL hahú forma ekipa investiga kazu joven ida mate iha sela detensaun

Ekipa Polísia FORENSIK transporta ona mate-isin JB ba HNGV atu hala’o prosesu autópsia. Imajen/Natalino Costa.

DILI, 02 setembru 2022 (TATOLI)—Komandante Jerál Polisia Nasionál Timor-Leste (PNTL), Komisáriu Faustino da Costa, informa daudaun ne’e parte Komandu Jerál PNTL hahú forma ekipa independente hodi halo investigasaun kle’an ba kazu joven ida ne’ebé mate ho kondisaun fiu eletrisidade iha kakorok, iha sela detensaun Komandu PNTL Dili.

“Ha’u dehan de’it ba ita bo’ot sira katak, ita prepara ona ekipa no ha’u halo ona despaisu hodi ekipa ne’e atu halo sira nia serbisu iha tempu badak nia laran, atu buka investiga motivu hosi kazu joven ida mate (….) iha sela detensaun Komandu PNTL Dili,” katak Komisáriu Faustino ba jornalista sira iha Kuartél Jerál PNTL Caicoli, sesta ne’e.

Komandante Jerál PNTL, Komisáriu Faustino da Costa. Imajen TATOLI/Egas Cristóvão

Ekipa ne’e rasik la envolve membru Komandu PNTL Munisipiu Dili, maibé membru sira ne’ebé envolve iha ekipa investigasaun mai hosi membru Komandu Jerál PNTL-nia.

“Ita nia ekipa ne’e kompostu husi ema nain-lima hosi membru Komandu Jerál PNTL,” nia afirma.

Tanba ne’e, Komandante Jerál ne’e dehan seidauk bele hateten buat balun relasiona ho kazu joven ida mate ho kondisaun fiu eletrisidade iha kakorok, iha sela detensaun Komandu PNTL Dili, tanba kazu ne’e  sei iha hela prosesu investigasaun nia laran.

“Ha’u seidauk ko’alia  buat ruma relasaun ba motivu hosi kazu ne’e no mós atu demite, Komadante PNTL Munisipiu Dili nia kargu, tanba  kazu ne’e sei iha hela  prosesu investigasaun nia laran, tanba ne’e ha’u seidauk bele ko’alia buat ruma,” nia afirma.

Iha sorin seluk, Komandante PNTL Munisipiu Dili, Superintendente Xefe Polisia Henrique da Costa, rejeita hodi fó komentáriu kona-ba motivu hosi kazu ne’e.

“Ha’u labele ko’alia buat ida, tanba kazu ne’e sei iha hela prosesu investigasaun nia laran no kazu ne’e Komandante Jerál delega ona ekipa kompostu hosi Komandu Jerál PNTL maka atu halo investigasaun,” katak nia.

Entretantu, suspeitu ida ho inisiál JB, mate ho fiu eletrisidade iha kakorok, iha sela detensaun Kaikoli, PNTL, Komandu Munisípiu Dili.

Joven ho inisiál JB nu’udar suspeitu ba kazu konfrontu ka halo agresaun fíziku iha festa graduasaun ida iha área Audian.

Nune’e, PNTL Dili detein suspeitu iha sela detensaun, iha loron kuarta (31/08), kalan, atu kumpre oras 72, molok submete ba interrogatóriu dahuluk iha Tribunal Distritál Dili (TDD). Maibé, iha loron kinta (01/09), tuku 19:00, suspeitu JB mate iha sela detensaun.

Hafoin akontesimentu ba kazu ne’e, Komandu PNTL Dili komunika kedan parte família matebian no Ministériu Públiku no Polísia Investigasaun Kriminál Nasionál (PNSIK), ekipa FORENSIK Komandu Jerál PNTL to’o kedan iha fatin akontesimentu hodi sai sasin.

Maske, parte família no kolega matebian la simu mate ne’e, tanba ho kondisaun fiu eletrisidade iha kakorok, maibé Sekretáriu Jerál Organizasaun Arte Marsiál Persaudaraan Setia Hati Terate (PSHT), Pedro Aparicio ho Ekipa PNSIK konsege hakalma situasaun hodi transporta mate-isin bá HNGV atu halo prosesu autópsia.

Notísia relevante: Ekipa konjunta hahú rekolla evidénsia ba kazu joven ida mate iha sela detensaun polísia

Jornalista  : Natalino Costa

Editór          : Florencio Miranda Ximenes

iklan
iklan

Leave a Reply

iklan
error: Content is protected !!