iklan

NASIONÁL, KAPITÁL

AMD sei orienta administradór postu tau-matan pesoál saneamentu hamoos jardin

AMD sei orienta administradór postu tau-matan pesoál saneamentu hamoos jardin

Pesoál saneamentu ka traballadór sira hamoos valeta ne’ebé intupidu iha área Palásiu Governu nia oin, kinta (21 jullu 2022). Imajen Tatoli/Antonio Daciparu.

DILI, 05 setembru 2022 (TATOLI)—Adjuntu Prezidente Autoridade Munisípiu Dili (AMD), António Moniz Clau, informa Autoridade Munisípiu Dili sei orienta Administradór Postu Administrativu sira, atu tau-matan ba pesoál saneamentu sira hamoos jardin iha kapitál Dili.

Notísia Relevante: Jardin kapitál foer: administradór postu administrativu sira-nia responsabilidade

“Kona-ba limpeza lolos labele dehan foer no laiha razaun ida atu dehan jardin foer, tanba iha ne’ebá ita koloka kada postu iha pesoál saneamentu na’in-35, ida-ne’e ita bolu Pesoál Limpeza Sidade (PLC). Sira-ne’e la’ós dehan sira-nia área limpeza to’o de’it iha kanu no sáluran ne’ebé ita temi maibé sira-nia área kobertura ba mós jardin no Estrada Públiku sira. Se tuir ita-boot (jornalista) sira-nia observasaun haree katak jardin sira foer, ida-ne’e ami sei orienta ba Administradór Postu sira atu tau matan ba pesoál saneamentu iha jardin sira,” António Moniz Clau hateten ba Agência Tatoli, iha nia kna’ar fatin, Dili, segunda ne’e.

Nia esplika, kona-ba kontrolu ba jardin iha kapitál Dili, ida-ne’e administradór postu sira-nia kontrolu tanba Autoridade Munisípiu Dili entrega direta ona ba sira hodi halo kontrolu no jera iha jardin sira.

“Sira labele fó razaun dehan menus rekursu humanu tanba ema na’in-35 kada postu ida-ne’e dala ruma ita-nia jestaun mak la di’ak. Ezemplu, iha Vera Crúz iha jardin tolu ka haat, prontu sira ne’e la’ós ba hamoos jardin de’it maibé sira mós hamoos ita-nia esgotu sira iha sidade laran maibé ida-ne’e kabe ba jestaun oinsá administradór postu atu tau ema permanente rua (2) iha jardin sira, entaun ida-ne’e ami sei bolu sira atu orienta hamoos jardin foer),” nia dehan.

Aleinde ne’e, autoridade munisípiu Díli lahanoin atu aumenta rekursu umanu iha tinan 2022, tanba iha programa PMOPA no Programa Limpeza Sidade (PLC, sigla portugés) iha postu administrative sira iha Dili.

“Agora ida-ne’e kabe ba sira oinsá atu halo jestaun, tanba ita haree ema barak ona atu halo servisu limpeza maibé jestaun dala ruma mak ladún di’ak,” nia dehan.

Administradór postu administrativu Vera Crúz, Manuel Gusmão, hateten administradór postu Vera Crúz iha ema na’in-20 ne’ebé kolokadu ba Pesoál Limpeza Sidade (PLC), maibé pesoál 20 ne’e mós Administradór Postu Vera Crúz koloka ba limpeza iha jardin sira.

“Ita-nia pesoál ne’e ami koloka kedas iha jardin sira, tanba de’it ami iha ema na’in-20, depois ita hatene jardin iha Vera Crúz mós barak, hanesan, jardin iha Tiger Fuel nia oin, Prokuradór Colmera oin, 05 Maio no Igreja Motael oin. Entaun, ho ita-nia pesoál na’in-20 ne’e ami loro-loron koloka iha jardin sira maibé tanba 20 de’it ami mós tenke fahe sira. Se ami konsentra de’it fatin ida-ne’e la hatudu rezultadu, tanba foer mai loro-loron. Aleinde ne’e ita hotu hatene jardin iha 05 Maio ida-ne’e foer barak no ai-hali nia tahan barak iha ne’ebá,” nia dehan.

Notísia Relevante: AMD kontrata ona pesoál limpeza 112 hamoos jardin kapitál

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!