iklan

INTERNASIONÁL, HEADLINE

Antes ba Canbera, PR hasoru malu ho komunidade Timoroan iha Darwin

Antes ba Canbera, PR hasoru malu ho komunidade Timoroan iha Darwin

Prezidente Repúblika, José Ramos Horta, tebe-dahur ho komunidade timoroan sira iha Darwin, hafoin jantar konfraternizasaun iha Darwin, Austrália, segunda (05/09). Imajen Tatoli/Rafy Belo.

DARWIN, 05 setembru 2022 (TATOLI)—Prezidente Repúblika, José Ramos Horta, antes dezloka ba Canbera, segunda ne’e, PR hasoru malu ho komunidade timoroan sira-ne’ebé halibur aan iha ‘Portuguese & Timorese Social Club’ iha Darwin, Austrália.

“La hakat liu de’it, para iha ne’e (Darwin) halibur timoroan sira iha ne’e: timoroan-Xina, timoroan-portugés, mistura barak. Ne’e mak rikusoin Timór nian,” Prezidente repúblika, José Ramos Horta hateten.

Prezidente repúblika mós informa ba komunidade timoroan sira-ne’e katak nia vizita mai Austrália hodi hametin liután relasaun entre Timor-Leste ho Austrália.

”Obrigadu ba ita-boot (timoroan) sira-nia prezensa,” PR Horta hateten.

Labele husik língua ofisiál

Prezidente Repúblika, José Ramos Horta, hamutuk ho grupu kultural timoroan iha Darwin, Austrália, segunda (05/09). Imajen Tatoli/Rafy Belo.

Iha biban ne’e, Xefe Estadu perante komunidade timoroan sira iha Austrália katak ‘kaer-metin’ no labele husik  língua ofisiál Timor-Leste nian.

“Labele husik língua ofisiál ida-ne’e. Língua ofisiál rua Timor-Leste nian mak tetun no portugés,” PR hameno.

Língua ofisiál Timor-Leste nian konsagra iha Konstituisaun Repúblika demokrátika Timor-Leste (RDTL) artigu 13, no iha konstituisaun ne’e rekoñese mós lian inglés no Bahasa Indonézia nu’udar lian serbisu nian.

Iha oportunidade ne’e, komunidade timoroan ne’ebé reside iha Austrália, Henrique Yap, hateten nu’udar timoroan hakarak fila-fali ba Timor-Leste.

“Ami hakarak fila-fali ba Timór para business (negósiu) fila fali. Ita bele halo interrasaun, ita bele ajuda malu. Timoroan mós mai serbisu iha Austrália barak. Kuandu ita iha interrasaun barak hanesan ne’e, Timór sei iha futuru ida diák,” nia dehan.

Entretantu, Prezidente Repúblika, José Ramos Horta sei hala’o vizita Estadu iha Austrália hahú hosi loron 6 to’o 11 tanba konvite hosi Governadór Jerál Austrália, Han David Hurley.

Iha Austrália, Xefe Estadu, José Ramos Horta, sei hala’o vizita ofisiál iha Canbera, Sidney no Darwin.

Vizita Xefe Estadu nian iha Austrália tanba Austrália no Timor-Leste nu’udar viziñu no belun ne’ebé besik, nune’e ho vizita ofisiál ne’e bele hametin liután parseria no amizade entre nasaun rua no esplora liután kooperasaun iha dezenvolvimentu ekonómiku, defeza no seguransa, edukasaun, mobilidade laborál no inisiativa rejionál.

Notísia Relevante: Ohin, PR Horta dezloka ba Austrália

Jornalista : Rafy Belo

Editór        : Cancio Ximenes

iklan
iklan

Leave a Reply

iklan
error: Content is protected !!