DILI, 05 setembru 2022 (TATOLI)—Prezidente Repúblika (PR), José Ramos Horta, segunda ne’,e ho delegasaun dezloka ona ba Austrália hodi hala’o vizita Estadu ne’ebé hetan konvite hosi Governadór Austrália, David Hurley.
Notísia Relevante: PR Horta vizita Austrália sei ko’alia prosesu dezenvolvimentu Greater Sunrise
“Austrália no Timor-Leste hanesan nasaun viziñu no amigu. Vizita ida-ne’e hanesan oportunidade ida haforsa parseria entre ita-nia nasaun no explora dalan ba kooperasaun dezenvolvimentu ekonómika, seguransa no defeza, edukasaun, mobilidade traballadór no inisiativa rejionál,” refere komunikadu imprensa hosi mídia Palásiu Prezidesiál ne’ebé Agéncia Tatoli asesu, segunda ne’e.
PR sei hala’o vizita Estadu iha Canberra, Sydney no Darwin no iha Canberra, sei hasoru malu ho Governadór Jerál Austrália, Primeiru-Ministru Austrália, Anthony Albanese no Ministra Negósiu Estranjeiru, Penny Wong.
Iha vizite ne’e, Xefe Estadu mós sei halo intervensaun iha nasionál Press Club no halo mós vizita ba ospitál Royal Darwin Hospital, Menzies School of Health Research, National Critical Care Centre and LNG facilities, inklui ajenda sira seluk.
Hafoin simu pose iha loron 20 maiu ne’e PR halo ona vizita ba estranjeiru dahuluk ba iha Indonézia no vizita daruak mak ohin ba iha Austrália ne’ebé sei fila hikas mai Timor-Leste iha loron 12 fulan setembru ne’e.
Nune’e, iha loron 21-30 setembru, Xefe Estadu sei hala’o vizita Estadu ba Estadu Unidu Amérika (EUA) hodi parsitipa sesaun asembleia jerál Nasaun Unida nian iha Nova Iorke.
Jornalista : Nelson de Sousa
Editór : Cancio Ximenes
