iklan

COVALIMA, POLÍTIKA

Covalima realiza “Tocha da Pás” relembra padre no sarani sira mate iha igreja Suai

Covalima realiza “Tocha da Pás” relembra padre no sarani sira mate iha igreja Suai

Igreja Ave Maria Suai. Imajen/Espesiál.

COVALIMA, 05 setembru 2022 (TATOLI)–Autoridade Covalima hamutuk ho sobrevivente, populasaun no estudante sira realiza atividade “Tocha da Pás” ho tema “Masakre 06 Setembru 1999, Povu Covalima 134 inklui padre na’in-tolu ne’ebè mak nakfilak ba Setembru Negro” hodi komemora masakre setembru Negro 1999 ba dala-XXIII iha munisípiu Covalima.

Notísia Relevante: Kovalima Konsidera Padre Nain Tolu Eroi Boot

“Ita realiza atividade tocha da pás (obor perdamaian) ida-ne’e hodi relembra padre na’in-tolu hamutuk sarani sira mate iha igreja Ave Maria Suai iha tinan 1999. Iha momentu ne’eba situasaun defisil ita luta ita hili de’it mate ka moris ami hamutuk padre na’in-tolu, ami sempre halo diskusaun,” Administradór Munisípiu Covalima, Francisco De Andrade, hatetem ba jornalista sira, iha resintu igreja Ave Maria Suai, segunda ne’e.

Administradór mós konta istória katak, iha momentu ne’e nia husu ba padre Francisco Soares no Tarsisius Dewanto atu sai, maibé padre Francisco no Dewanto hatan dehan sarani sei mantein iha ne’e bainhira padre sira sai uluk tuir juramentu ne’e falsu

“Iha momentu ne’e, ha’u ho padre Hiliario Madeira fó korajen husu sarani sira atu sai ona, ita ida-idak buka ita-nia moris. Balun konsege sai, balun la konsege. Ha’u husik fatin no komandante Samba 9 hein ha’u iha Odelgomo atu forma estrutura OPMT, ha’u husik sira loron ne’e ami sai aluga karreta ho naran Tartaruga,” nia haktuir.

Maske situasaun defisil sai hosi igreja Ave Maria Suai, hanesan grasa Maromak nian kuandu sai  bainhira viajen to’o iha suku Beco, grupu milísia Mati Hodup Integrasi (MAHIDI) ho sira joga karta hela entaun konsege liu.

Nu’udar Covalima oan hanesan mós autoridade padre na’in-tolu hamutuk sarani sira mate iha igreja ho sira-nia mate mak ohin loron bele hetan liberdade. Tanba ne’e, sidadaun sira tenke iha konxiénsia rasik atu partisipa komemora masakre Setembru Negro.

Tocha da Pás ne’e hala’o hodi la’o ain hahú hosi Ogues mai iha Igreja Ave Maria Suai, ho estudante sira lori pamfletu hodi hakerek liafuan “Ha’u ofrese ha’u-nia moris tomak ba ha’u-nia aman, nu’udar fini ida ba rai doben Timor-Leste”.

Hafoin realiza atividade tocha da pás kontinua realiza atividade kalan refelsaun iha resintu igreja Ave Maria Suai ne’ebé diriji hosi padre pároko Fohorem.

Notísia Relevante: Setembru Negro, mate-isin butuk iha igreja oin hanesan foho oan ida

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!