iklan

DILI, MUNISÍPIU

Kompañia Auto Timor sai manan-na’in sosa karreta funeráriu lima

Kompañia Auto Timor sai manan-na’in sosa karreta funeráriu lima

Karreta Funeráriu. Imajen Tatoli/Osória Marques.

DILI, 05 setembru 2022 (TATOLI)—Diretór Nasionál Asisténsia Sosiál (DNSA), Lucas Tois, informa Kompañia Auto Timor mak sai manan-na’in atu sosa karreta funeráriu lima (5) tanba sira asina ona kontratu hodi sosa no iha tempu besik no sei to’o iha Timor-Leste.

Notísia Relevante: MSSI reanúnsiu konkursu públiku sosa karreta funeráriu lima

“Kona-ba planu atu sosa karreta funeráriu lima ne’e, Kompañia Auto Timor mak sei sosa karreta funeráriu ne’e tanba nia mak sai manan-na’in. Objetivu sosa karreta ne’e atu reforsa tan karrete seluk,” Lucas Tois hateten ba Agência Tatoli, iha nia kna’ar fatin Caicoli, Dili, segunda ne’e.

Nia informa, orsamentu ne’ebé aloka atu sosa karreta funeráriu lima (5) ne’e hamutuk rihun $200-resin tanba kada karreta funeráriu ida-ne’e ninia folin sei kona rihun $47.

Antes ne’e, Diretór Nasionál Dirasaun Jestaun no Finansa Públika iha Ministériu Solidariedade Sosiál no Inkluzaun (MSSI), Jemmy Valente dos Reis, hateten planu ne’e tama mós ba osan adisionál MSSI nian inklui ho programa “bolsa da mãe ba jerasaun foun ” ne’ebé mak MSSI husu ba KROP hamutuk millaun $6,2.

Daudaun ne’e, Ministériu Solidariedade Sosiál no Inkluzaun (MSSI) iha karreta funeráriu 40-resin ne’ebé iha Dili karreta funeráriu 13 ba atendimentu públiku no ida ba ema importante (VIP- sigla Inglés) no kada munisipiu inklui Rejiaun Administrativu Espesiál Oé-Cusse Ambeno (RAEOA) iha karreta rua (2) ne’ebé Governu sosa ona iha 2009 no 2013.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!