VIQUEQUE, 03 setembru 2022 (TATOLI)—Traballadór Programa Mão de Obra Postu Administrativu (PMOPA) durante hala’o atividade loke dalan foun, konsege kee sai mate-ruin ida iha suku Ossu de Cima, postu administrativu Ossu, munisípiu Viqueque.
Administradór postu Ossu, Sebastião Pereira Pires, haktuir, traballadór sira hetan mate-ruin bainhira atu kee dalan foun hosi suku Ossu de Cima liga ba postu administrativa Ossu, nune’e ohin bolu Polísia Nasionál Timor-Leste (PNTL) Eskuadra Ossu no pesoál saúde hosi sentru saúde Ossu mai akompaña hodi kee sai mate-ruin hodi tau iha postu administrativu Ossu.
“Ha’u konvida parte hotu mai asiste maka kee sai mate-ruin hodi tau provizóriu iha edifísiu administrasaun munisipál. Ha’u sei koordena ho Prezidente Veteranu Viqueque hodi prepara kaixaun hodi tau mate-ruin sira. Bainhira família buka mate-ruin mak sei bolu sasin,” Autoridade hateten iha postu Ossu, segunda ne’e.
Notísia relevante: Suku Macadique hahú implementa atividade PMOPA
Iha fatin hanesan, Sasin ba mate-ruin, Fernando Rodrigues, haktuir, militár indonéziu baku mate saudozu ne’e iha tinan 1983, momentu matebian sei iha prizaun Ossu.
“Iha momentu ne’ebá, militár indonéziu sira baku nia to’o isin metan hotu, maibé la koñese matebian hosi parte ne’ebé nian no matebian mate ema hakoi de’it iha fatin ne’e. Iha funu ami iha sela hamutuk,” nia akresenta.
Jornalista : Vitorino Lopes da Costa
Editora : Julia Chatarina
