iklan

HEADLINE, MUNISÍPIU, VIQUEQUE

Suku Macadique hahú implementa atividade PMOPA

Suku Macadique hahú implementa atividade PMOPA

Komunidade suku Macadique hahú implementa atividade limpeza PMOPA, tersa (31/08). Imajen Tatoli/Vitorino Lopes da Costa

VIQUEQUE, 31 agostu 2022 (TATOLI)—Suku Macadique, postu administrativu Uatulari, munisípiu Viqueque hahú implementa ona atividade programa ‘mão de obra’ postu administrativu (PMOPA) hodi fó biban komunidade halo atividade limpeza iha suku laran.

“Ami hahú implementa ona programa mão de obra iha suku Macadique hodi envolve direta komunidade halo serbisu limpeza iha suku laran. Ha’u sente programa ida-ne’e fó duni benefísiu ba komunidade no ambiente,” Xefe suku Macadique, Afonso dos Reis, hateten iha suku Macadique, kuarta ne’e.

Atividade hosi PMOPA ne’ebé suku Macadique implementa maka limpeza iha aldeia no suku, aterru dalan, postu saúde, eskola no kuda ai-oan iha fatin rezisténsia kompañia Karau Fuik Edimumu.

“Ha’u sente atividade sira ne’e di’ak tanba ambiente sai moos. Tanba ne’e, ha’u husu Governu se bele kontinua implementa programa ne’e hodi ambiente sai moos no komunidade bele hetan netik osan,” nia akresenta.

Notísia relevante: Postu Uatulari implementa atividade 53 hosi PMOPA

PMOPA iha suku Macadique implementa iha aldeia 21, ne’ebé kada aldeia ida iha ema 20 maka envolve halo serbisu no kada loron traballadór ida hetan $5.

Suku ne’e implementa PMOPA ho durasaun serbisu loron-240, ho alokasaun orsamentu ba transporte $1.875 no pagamentu ba traballadór ne’ebé halo serbisu $24.480.

Iha fatin ketak, Koordenadór PMOPA suku Macadique, Muamat Nur Hidait, hateten, bazeia ba nia monitorizasaun, implementasaun programa iha suku ne’e la’o di’ak no konsidera importante tanba hola parte iha prosesu dezenvolvimentu suku.

“Hosi programa ida-ne’e komunidade bele hetan netik osan hodi benefisia ba sira-nia moris tanba hetan osan,” nia tenik.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!