DILI, 05 setembru 2022 (TATOLI)—Sekretáriu Estadu Ambiente (SEA), Demétrio do Amaral Carvalho, hateten, tinan ne’e, Governu hili eskola haat hodi implementa programa ‘eskola matak’ iha munisípiu Dili, Bobonaro no Liquiçá.
“Objetivu hosi programa ne’e mak atu transforma mentalidade alunu sira tau lixu iha lixeiru hodi garante ambiente moos no saudável,” Sekretáriu Estadu Demétrio hateten iha Acait, segunda ne’e.
Nune’e, SEA asina akordu ho implementadór Organizasaun Naun Governamentál (NGO) Hatutan inklui grupu implementadór tolu hanesan Johan, Hoca, no antigu alunu Canossa, atu implementa programa ne’e.
Notísia relevante: SEA realiza atividade estudu komparativu ba programa ‘Eskola Matak’
Diretora Sentru Edukasaun Informasaun Ambientál (CEIA, sigla portugés), Amenica Fernandes, hateten, grupu implementadór sira ne’e sei implementa programa eskola matak, ne’ebé grupu Hoca sei implementa iha Eskola Ensinu Báziku Filiál (EBF) 1,2 da Lebo tata Lelo iha Liquiçá, grupu Johan implementa iha Eskola Ensinu Bázika Sentrál (EBC, sigla portugés) 03 Loidhar Liquiçá, NGO Hatutan sei implementa iha Eskola Tékniku Vokasionál Atabae munisípiu Bobonaro no grupu antigu alunu Canossa sei implementa iha Eskola Canossa Dili.
“Governu aloka orsamentu hamutuk $5.000 hodi realiza programa eskola matak ne’e hodi implementa iha jardin infánisa no universidade,” nia akresenta.
Nia dehan, implementadór sira ne’ebé ohin asina akordu, antes ne’e iha hitu mak kompete maibé CEIA halo selesaun rigorozu no ikus mai implementadór haat mak liu tanba prienxe rekezitu.
Iha biban hanesan, Reprezentante implementadór NGO Hatutan, Fortunato Carmona, hateten, sira-nia parte sei organiza no koordena ho koordenadór eskola sira hodi implementa programa ne’e.
“Liuhosi koordenasaun no jestaun mak bele ajuda garante programa eskola verde hodi bele susesu. Ami sei implementa iha Liquiçá durante fulan-haat,” nia tenik.
Jornalista : Arminda Fonseca
Editora : Julia Chatarina
