DILI, 06 setembru 2022 (TATOLI)-Dom Virgílio Kardeál do Carmo da Silva, konvida sarani hotu atu moris tuir Maromak nia santuáriu.
“Buka besik liután ba Maromak no buka atu esperiénsia Maromak iha ita-nia moris nu’udar sarani. Ita mós presiza aprende atu sa’e tuir nai iha foho maibé iha salmu 24 dehan, sé mak bele sae ba nai nia foho no sé mak bele hamriik iha nai nia santuáriu no salmu ne’e kontinua dehan ema bee liman moos,’’ Dom Virgílio Kardeál do Carmo da Silva, hato’o bainhira prezide misa iha Uma Adat João Paulo II, Tasi-Toli, tersa ne’e.
Nune’e habadak karik ho liafuan nai Maromak halo konvite ida ba ema hotu, katak dalabarak fila kotuk ba nai Maromak, tán ne’e Maromak bolu ema idak-idak, liuliu hirak-ne’ebé hatudu nia vontade di’ak hakarak atu kolabora ho Maromak ninia planu.
Evanjellu hahú ho fraze ida ‘Jesus sa’e ba foho’ atu harohan no molok atu fihir ema ne’ebé sei sai nai nia kolaboradór ka apóstolu.
Eminénsia esplika, dalaruma ida koko momentu rua ne’e simultaneamente hanesan iha rai laiha, rai ida-ne’ebé tetuk de’it nune’e mós iha moris iha ninia aas nune’e mós iha ninia tetuk.
“Foho iha sagrada kriatura hanorin ita liasaun ruma kona-ba moris no ba Maromak ninia di’ak no grasa sa’e foho ezije preparasaun no forsa atubele la’o to’o rohan iha sagrada kriatura iha istória barak kona-ba foho hanesan Abrão Maromak koko nia fidelidade atu sakrifika nia oan mane mesak Isaac, Abraõ la revolta maibé nia hatene obedese halo tuir haruka nia atu lori de’it buat-ne’ebé presiza hodi halo sakrifísiu iha foho leten ne’ebé ho fidelidade ba Maromak hodi haraik bensaun no salva nia oan,’’ nia haklaken.
Nune’e Maromak mak Maromak ne’ebé loos harohan hodi husu ahi hosi lalehan hodi hamaran bee ne’ebé sira fakar ba ahi, ema hosi rai ohin loron kontinua konsidera foho Karmelu foho santu iha ne’ebé ema ba atu harohan no husu grasa.
“Ne’e hotu hatudu mai ita oinsá Maromak halo buat kmanek oinoin iha fatin ne’ebé aas no bele hetan konfirmasaun to’o buat-ne’ebé hakerek karta ba Ebreu, ne’ebé dehan to’o ba foho sira no Maromak nia sidade Jerujalem lalehan iha ne’ebé anju rihun ba rihun halibur-aan tiha ba festa sa’e ba signifika buka besik liután ba Maromak,” Eminénsia Dom Virgílio Kardeál do Carmo da Silva salienta.
“Maibé, ita la’os mai atu pasa vida ka turizmu maibé ita mai atu harohan tanba ne’e ida mai ho espíritu sakrifísiu nian no ita hakarak esperiénsia Maromak nian iha fatin ida-ne’e.”
Notísia relevante: Eminénsia Don Virgílio Cardeal husu grupu arte-marsiál promove dame
Jornalista : Nelson de Sousa
Editór : Evaristo Soares Martins
