iklan

HEADLINE, MUNISÍPIU, VIQUEQUE

ONG KdP apoiu grupu BBM hakiak manu broiler iha Viqueque vila

ONG KdP apoiu grupu BBM hakiak manu broiler iha Viqueque vila

Grupu BMM kolleta manu broiler iha Viqueque Vila, tersa (06/09). Imajen Tatoli/Vitorino Lopes da Costa

VIQUEQUE, 06 setembru 2022 (TATOLI)–Organizasaun Naun Govermentál (ONG) Kolega da Pás (KdP) Baucau fó apoia ba grupu Babunak Bahafu Manulae (BBM) hodi hakiak manu broiler hamutuk 1.000 iha aldeia Babunak, suku Uma-kiik, postu administrativu Viqueque vila, munisípiu Viqueque.

Tuir Diretora ONG KdP Baucau, Olga Matilda da Costa, molok grupu BBM atu hakiak manu broiler, KdP fó uluk formasaun kona-ba prosesu hakiak manu durante semana rua iha Baucau hodi sira bele hatene prosesu.

“Hafoin formasaun, ami distribui fini manu broiler ba grupu hodi hakiak tanba prosesu hakiak ne’e diferente tebes ho manu Timor,” Diretora informa ba Agência Tatoli, hafoin ramata atividade kolleta manu bloiler, iha aldeia Babunak, tersa ne’e.

Notísia relevante: Veteranu Covalima kria grupu hakiak animál

Aleinde ne’e, KdP fó apoiu materiál konstrusaun manu-luhan ba grupu BMM, ne’ebé ONG ne’e hetan fundu hosi Servisu Sosiadade Sivil iha Gabinete Primeiru-Ministru.

“Apoiu ne’e kompostu hosi fini manu hamutuk 1.000, materiál konstrusaun no hahán ba manu nian ho totál fundu $15.000. Grupu sira simu fini iha fulan-agostu no ohin ita hahú kolleta durante fulan-ida,” nia akresenta.

Daudaun ne’e, ONG KDP foin fó apoiu ba grupu ida iha munisípiu Viqueque, maibé ba futuru sei alarga tan ba suku seluk ba atividade veterinária, nune’e bele sustenta ekonomia família.

Iha fatin hanesan, Vise-Prezidente grupu BBM, Julio Sarmento, sente kontente no apresia ho programa.

“Ami sente kontente tanba agora hetan ona rezultadu, maski foun-foun ami hakiak sente susar maibé ikus hetan ona rezultadu,” nia tenik.

Grupu BBM iha membru ativu 30 hodi tau-matan ba manu, ne’ebé kada manu fa’an ho folin $5,50.

Atividade kolleta ne’e hetan partisipasaun hosi Administradór postu Viqueque vila, Inspetór Xefe Polísia Nasionál Timor Leste (PNTL) munisípiu Viqueque, Xefe suku Uma-kiik inklui komunidade lokál.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!