iklan

COVALIMA, POLÍTIKA

Biki’ak: “Masakre 06 setembru lori ha’u moris iha infernu laran”

Biki’ak: “Masakre 06 setembru lori ha’u moris iha infernu laran”

Sobrevivente Masakre Setembru Negro 1999 iha Suai, Maria Carvalho Amaral “Biki’ak”. Imajen Tatoli/Celestina Teles.

DILI, 07 setembru 2022 (TATOLI)—Masakre Setembru Negro 06 setembru 1999 iha igreja Ave Maria Suai nu’udar masakre planeadu ne’ebé akontese hafoin konsulta popular 30 agostu 1999.

Tuir relatóriu Comissão de Acolhimento, Verdade e Reconciliação (CAVR) “Chega!” haktuir masakre ne’e konsidera hanesan asaun asasinatu masál planeadu hasoru populasaun sivíl sira no masakre ne’e hatudu duni operasaun koordenada entre militár Indonézia hanesan Komando Rayon Militer (KORAMIL) Salele, Komando Distrik Militer (KODIM) Suai (militár Indonézia) no membru milísia LAKSAUR.

Notísia Relevante: Masakre Setembru Negro nia hun mai hosi 26 fevereiru 1999

Militár Indonézia no Milísia LAKSAUR hahú asaltu ba igreja Ave Maria Suai iha tuku 14h00 lorokraik, sira soe granada no tiru iha arreadores igreja Ave Maria Suai nia laran hodi halo atake ba populasaun sira-ne’ebé buka protesaun iha igreja laran.

Milísia LAKSAUR ne’ebé komanda hosi Olívio “Tato” Mendonça Moruk no Komandante Milísia MAHIDI (Mate Hidup Integrasi) lidera hosi Cancio Lopes de Carvalho inklui militár Indonézia ne’ebé komanda hosi Komandante KODIM, Letkol Liliek Koes Hadianto, Letnan Sugito no Komandante POLRI (Polisi Republik Indonesia) Suai, Letkol Gatot Subiaktoro.

Sira oho populasaun hamutuk ema na’in-200-resin, inklui Padre Hiralrio Madeira, Padre Tarsisius Dewanto no Padre Francisco Soares. Aleinde ema sira-ne’ebé oho iha igreja Ave Maria Suai, iha mós ema na’in-30 seluk mak milísia no militár Indonézia sira oho hafoin atake iha igreja Ave Maria Suai iha loron 06 setembru 1999.

Bazeia ba relatóriu “Chega!” ne’e, jornalista Agência Tatoli, Celestina Teles, hala’o entrevista ho sobrevivente Masakre Setembru Negro 1999 iha Suai, Maria Carvalho Amaral “Bui Kiak”, haktuir ninia istória subar iha igreja Ave Maria Suai to’o milísia sira lori feto 200-resin ba edifísiu Komando Distrik Militer (KODIM) Suai, Maria Carvalho Amaral “Biki’ak” haktuir;

Ha’u hasoru ha’u-nia família, ha’u sempre tanis. Signifika ha’u kontente tanba ha’u moris ona. Durante fulan ida tama fulan rua hela iha kampu refujiadu Betun-Indonézia, masakre 06 setembru 199 iha suai ne’e, lori ha’u hanesan moris iha infernu laran. Iha loron 12 fulan-novembru 1999, ha’u to’o iha Suai, hasoru malu ho família sira kontente no ami tanis hamutuk tanba sai ona hosi nakukun”.

Masakre 06 setembru nia hun 26 fevereiru 1999

Molok atu tama iha masakre Setembru Negro, akontesimentu dahuluk loloos ne’e família hosi ami na’in-rua ho ha’u-nia katuas-oan (Elizeu Gosmão ‘Sabelai’) bainhira membru milísia LAKSAUR ho militár Indonézia (TNI) asalta ami-nia uma, iha 26 fevereiru 1999, iha tuku 20h00 kalan. Sira baku ha’u-nia katuas-oan, ha’u no ha’u-nia oan-mane boot, ami hamutuk na’in-10 mak sai vítima.

Iha momentu ne’e, ema tá ha’u-nia katuas-oan, balun ema tuku no tebe, sira na’in hira ema kaer  lori mai sulan iha edifísiu Komando Distrik Militer (KODIM) Suai. Ha’u ho ha’u-nia oan tinan rua (2) fulan 10 hetan baku hotu. Hafoin ne’e, iha tuku 02h00 madrugada, ami mai iha igreja Ave Maria Suai.

Hahú iha fulan-fevereiru ami hela iha igreja kuaze fulan hitu nia laran, to’o iha loron Konsulta Popular, 30 agostu 1999. Hafoin ida-ne’e, ami hotu hein rezultadu Konsulta Populár ne’ebé fó sai iha loron 4 fulan-setembru 1999, ami hotu kontente, hakilar, haklalak katak ita manán ona.

Durante fulan hitu (7) iha igreja Ave Maria Suai, tanba situasaun mak obriga ami hela iha igreja hodi subar an atu labele monu ba ema sira-ne’ebé mak lakohi ukun rasik an nia liman. Iha momentu ne’e, ha’u ho ha’u-nia katuas oan sai vítima dahuluk. Ho nune’e, ema kuñese ami katak ami ema ukun rasik an nian, entaun halo ami labele livre atu ba fali ami-nia uma. Dalan di’ak mak ami tenke subar iha igreja laran, nune’e ami bele salva ami-nia an.

Iha momentu bainhira ami halai mai iha igreja, Padre matebian Pe. Hilario Madeira mak simu ami hela durante fulan hitu (7) iha igreja. Ami hirak ne’ebé hakarak ukun rasik an ne’e, hala’o nafatin ami-nia ligasaun ho Forças Armadas da Libertacao Nacional de Timor-Leste (FALINTIL) sira tama-sai nafatin, ami hasoru malu kada postu administrativu hotu iha atividade atu hala’o eleisaun Konsulta Populár 1999.

Atividade ne’ebe mak ami halo hanesan halo kontribuisaun. Ha’u hanesan feto, ha’u envolve iha estrutura klandestitina hanesan Vise iha Organizasaun Populár Mulher Timor (OPMT), suku Casabauk, postu administrative Tilomar. Ha’u haree ha’u-nia feto maluk sira, ha’u organiza sira hodi mantein nafatin ita-nia pozisaun tanba ita tauk hodi rende ba sira-ne’ebé lakohi ukun rasik an.

Ami organiza malu ativu iha igreja atu hala’o kampaña. Ha’u organiza ha’u-nia feto maluk sira tuir kampaña liga ba ukun rasik an nian liu-liu oinsá halo sensibilizasaun ba povu oinsá atu tuir Konsulta Populár, 30 agostu 1999, oinsá atu hili Timor-Leste nia destinu ba ukun rasik an.

Hafoin rona tiha rezultadu Konsulta Populár iha 04 setembru 1999, hatudu katak populasaun Timor-Leste 78,5% hili ukun rasik an hodi rezeita autonomia espesiál. Iha momentu ne’ebá, hahú iha loron 4-5 setembru, ema barak sai liu-liu mane sira sai hosi igreja salva an halai ba ai-laran. Ha’u ho ha’u-nia família la konsege sai. La’os ami mesak, ema barak liu-liu ami feto, tuir ha’u-nia hatene feto kuaze 200-resin ema kaer, lori ami hotu ba iha KODIM Suai.

Milísia lori feto 200-resin ba KODIM Suai

Iha loron 6 setembru 1999, ema asalta ami iha igreja Ave Maria Suai. Ha’u subar iha madre nia kintal laran. Bainhira to’o kilat tarutu, ha’u lori ha’u-nia oan no ha’u-nia inan halai tama ba madre sira-nia uma laran, momentu madre superiór Canosiana ho naran madre Alice, konsege duni ami dehan imi sai hosi ne’e. Tanba de’it imi-nia kaben sira-nia hahalok mak ohin loron sai hanesan ne’e.

Maibé, ha’u rona nia liafuan, sira nafatin tama iha sira-nia kapela. Ema tiru ami iha tuku 14h00 to’o tuku 18h00 kalan mak ema hasai ami. Molok atu hasia ami iha parte madre nian fatin ne’e, ema-ne’ebé subar iha igreja laran, iha andar sira-ne’e lori ba hotu iha SMP 2 no balun ba iha KODIM.

Notísia Relevante: Setembru Negro, mate-isin butuk iha igreja oin hanesan foho oan ida

Masakre 06 setembru 1999 iha Igreja Ave Maria Suai. Imajen/Espesiál.

Maibé, antes ne’e, molok milísia sira atu asalta ami iha tuku 10h00 dadeer ne’e, milisia na’in-rua mai husu madre sira atu foti ami refujiadu sira atu lori ami ba Indonézia. Entaun, madre sira la autoriza. Hafoin ida-ne’e, iha tuku 12h00, milisia sira mai, ema ida naran Olivio “Tato” Mendonça Moruk ho nia kolega mai husu nafatin Padre Hilario Madeira atu hasai ami refujiadu hosi igreja atu lori ba Indonézia.

Maske milisia sira husu padre atu hasai refujiadu sira maibé padre sira la autoriza, entaun iha tuku 14h00 lorokraik. milísia sira asalta ami no sira haleu igreja Ave Maria Suai halo kabuar, ami iha klaran. Iha momentu ne’e milisia ho TNI monta buat hotu feitu ona.

Ha’u ho ha’u-nia katuas oan ho ha’u-nia ama, ami subar iha madre sira nia kintál laran, sira seluk subar iha igreja tuan laran, igreja foun andar nian ne’e, balun subar iha padre nia fatin, dapur, tratór okos no bidon laran.

Ami ne’ebé subar iha madre nia uma laran, ami ne’e sira foti ikus. Padre na’in-tolu no sarani lubuk ida mate hotu. Ikus liu, ikus tuku 17h00 ba tuku 18h00 mak milísia sira hasai ami hodi lori ba iha KODIM no SMP 2 Suai.

Iha momentu ne’e, ha’u ho ha’u-nia inan, ha’u-nia oan no ha’u-nia alin lori ami ba KODIM. Ami entrega an de’it ona, mate ka moris mós ami entrega an tanba ami iha ona ema (inimigu) nia-liman laran, entaun ha’u lahatene bainhira ema tiru mate padre na’in-tolu.

Ha’u ba to’o ha’u-nia tia naran Domingas hateten padre na’in-tolu (3) mate ona. Ha’u rona ha’u atu dezmaia. Se mak bele salva ita hosi ne’e? Entaun, iha loron 6 fulan setembru, ema hasai ami hosi igreja Ave Maria Suai ne’e lori ba KODIM durante loron ualu (8) kastigu ami hodi la fó han no hemu. Ami hela de’it iha rai-henek laran no loron manas laran. Milísia Laksaur sira halo tuir sira-nia hakarak. Sira lori feto sira ba iha fatin-fatin, sira halo violasaun seksuál makaas tebes. Ida-ne’e ami-nia terus durante loron ualu (8) iha Kodim Suai. Iha loron 14 fulan-setembru obriga ami no lori ami ba Indonézia.

Ba Indonézia; Iha kampu refijiadu Betun, loron ida han dala ida

Ema lori ami atu sai hosi KODIM Suai, ami-nia kolega barak sai ona. Molok atu sai, TNI (Tentara Nasional Indonesia) fó sai ona avizu katak sé mak iha família polisia (POLRI) no militár (TNI), imi hasoru imi-nia família bele ba hamutuk aranka ba Indonézia.

Maibé, kuitadu, ha’u-nia família laiha tanba família hotu-hotu hakarak ukun rasik an. Entaun, ha’u atu ba ho sé? Lorokraik atu sai, kamionete para ona oin, ami hein atu sa’e derrepente ha’u hasoru ha’u-nia katuas-oan nia tiun ho naran Rafael. Ha’u bolu nia dehan; Tiu ema agora lori ami atu ba Indonésia, Betun (Malaka), karik bele tiu ajuda ha’u no salva ha’u. Ha’u-nia kataus nia tiun ne’e, akompaña ha’u iha komioneta laran to’o fronteira mota-masin, ema labele hatun ha’u hodi oho.

Tanba, iha momentu ne’ebá, ema ne’ebé mak sira hatene katak pro-independénsia ne’e, to’o iha Fatuk Oan no to’o Tafara no fornteira Mota Masin, ema hatun hodi oho daudaun. Entaun, ha’u trauma ho ida ne’e, ha’u tenke husu ajuda ba tiu Rafael, nia mak akompaña ha’u-nia viajen hosi Suai ba iha Betun Raihenek Oan. Ami hela de’it iha uma refujiadu. Ema ne’ebé liman-raan atu oho ema ne’e mós hela iha fatin refujiadu nian ne’e mak Egidio Manek, Olivio Tato, Americo Mali no barak tan.

Iha momentu ne’e, ha’u ho ha’u-nia katuas oan kunesidu iha Suai, ma hotu hatene ha’u. Entaun, iha refujiadu nia fatin iha Betun, ha’u la sai ba buka hahan iha Baraka nia li’ur. Ami susar ba hahan no susar atu han. Iha loron ida, ajuda ba refujiadu sira, maun ida naran Quintino, antes ne’e nia sai xefe aldeia iha ami-nia bairru Salele Uma Mura, postu administrativu Tilomar, nia kuñese ha’u tama mai hodi rejistu ami-nia naran. Ha’u ho ha’u-nia inan konsege simu duni manta, lipa no seluk tan ha’u haluha ona.

Manta ne’ebe ha’u simu, to’o agora ha’u sei rai no atu rai iha muzeu. Ha’u la simu foos, loron ida ami han dala-ida de’it.

Hetan violasaun oioin

Ha’u-nia oan, momentu ne’e nia halo tinan tolu (3). Ba ha’u hahan laiha la problema maibé hetan ameasa, diskriminasaun, violasaun oioin de’it. Bainhira ita sai la’o ba-mai, ema sempre tafui tan kabeen ba ita. Ikus mai, ha’u rona informasaun, ami-nia kolega balun halai ona. Ha’u ho ha’u-nia ama ho ha’u nia oan, laiha dalan atu halai sai. Sé mak atu salva ha’u tanba ha’u-nia kolega balun ema fakar de’it iha kampu Betun-Wemasa, Sira, ita dehan, sira hanesan animál karik laiha luhan, husik livre, entaun ema tama-sai livre de’it hodi halo violasaun oioin.

Ha’u hela iha Maskar Raihenek Oan, ne’ebé perigu uitoan. Buat ida laiha ba ami. Ha’u hela durante fulan ida-resin, iha milisia balun atu hasai ha’u ho naran Olivio Tato atu hanoin aat mai ha’u tanba de’it ha’u lakohi simu nia. Nia se kilat no tau iha ha’u-nia hirus matan hodi dehan tanba saida mak ó lakohi simu ha’u.

Ha’u ba hakneak no hakruuk iha Olívio tato nia ain, Egidio Manek nia oan ida salva ha’u hodi dehan labele fó ha’u ema aat hanesan ne’e. Ho ida-ne’e mak ikus mai família balun salva ha’u liuliu família hosi parte ha’u-nia katuas oan nian. TNI balun husu ona ha’u maibé Egidio Manek dehan ida-ne’e ami-nia feto foun, imi tenke hasai nia tanba nia katuas oan mate ona no imi atu hola fali nia.

Entaun, ha’u-nia maun ho ha’u-nia kuñadu sira-ne’e labele ko’alia buat ida. Iha loron ida, ha’u nia prima ida naran Nanda ho nia katuas-oan, nia mak hasoru Egidio Manek foti ha’u iha markas.

Iha momentu ne’e, nia dehan, ha’u mai hodi nia bin nia naran atu foti nia alin tanba sira bin-alin. Molok maun Cornelio atu ba husu lisensa iha DANKI Egidio Manek tula uluk ona ha’u ba iha Betun Kletek, sira fó hatais ha’u no tula, ha’u uza sira-nia farda militár hodi ha’u sai hosi Betun Raihenek Oan ba iha Betun Kletek. Entaun, nia autoriza maun Cornelio, ha’u-nia família ami hela loron lima mak maun Cornelio buka dalan aluga ema xina ida-nia ró FIVER hodi ami mai Suai liuhosi tasi laran.

Fila mai Suai liuhosi tasi 

Foufoun, atu fila mai Suai ha’u laiha kbiit, osan mós laiha. Maun Cornelio ho nia kolega militár ida naran Jose Adelino hosi Labarai, sira na’in-rua ko’alia ho patraun ida Fiver hodi aluga ho osan Rp 100.00 hodi tula ami la’o kalan, lori ami mai iha Suai iha loron 11 fulan-novembru 1999. Iha momentu ne’ebá ne’e, kalan tuku 11h00 mak ami sa’e ho Fiver, liuhosi tasi laran hodi mai Suai.

Ami la’o hosi Betun Kletek dook, molok ami atu to’o ema ho motor rua hein ona ami. Tanba grasa Maromak ni’an ema lahetan ami. Sira lori lampu motor nian leno ami, hotu tuur tun iha lutu hun, subar an kuaze minutu 30 hanesan ne’e, motor na’in fila ami hakat liu no ami sa’e Fiver iha kalan boot. Ha’u-nia ama, ha’u-nia oan-mane no ha’u-nia alin, ami hamutuk 36 halai uluk mai Suai mai molok loke dalan iha fronteira ema atu ba-mai no tama-sai.

Ami halai sai mai, ami kalan ida iha tasi laran, iha loron 12 Novembru 1999, iha tuku 07h00 dadeersan, ami ho Fiver atraka iha Portu Suai Loro nian. Ami to’o iha Suai, ami toba kalan ida iha tasi laran, hafoin ne’e mak to’o iha portu Suai Loro.

Saudozu Sesurai dehan: Ita-boot nia katuas-oan sei moris

Iha momentu ami to’o iha portu Suai Loro, parte hosi United Nations High Commissioner for Refugees (UNHCR) mak simu ami. Iha postu Suai Loro ne’e ha’u hasoru saudozu Alvaro do Nascimento “Sesurai” no ha’u haree nia hodi hakuak ho tanis. Maibé saudozu Sesurai dehan ba ha’u; lalika tanis tanba ita-boot nia katuas oan sei moris. Sira lori kareta UNHCR mak tula ami ba SMA Negeri.

Ha’u hakarak atu hasoru malu ho família entaun sira dehan sé mak moras bele ba konsulta iha ospitál. Ha’u dehan, ha’u moras entaun kaereta UN nian ida tula ami ba ospitál. To’o iha ospitál, ha’u hetan no hasoru ha’u-nia família. Sira hetan ha’u-nia katuas-oan, nia husu ajuda lori karreta UN buka ha’u to’o hetan no tula ha’u ba iha Holbelis.

Ha’u hasoru ha’u-nia família, ha’u sempre tanis. Signifika ha’u kontente tanba ha’u moris ona. Drante fulan ida tama fulan rua hela iha kampu refujiadu Betun-Indonézia, masakre 06 setembru 199 iha suai ne’e, lori ha’u hanesan moris iha infernu laran. Iha loron 12 fulan-novembru 1999, ha’u to’o iha Suai, hasoru malu ho família sira kontente no ami tanis hamutuk tanba sai ona hosi nakukun.

Hafoin tinan 23 (06 setembru 1999-06 setembru 2022)

Durante tinan 23, ba ha’u, ha’u-nia moris atu di’ak ladi’ak nafatin maibé ha’u agradese nafatin. Memória pasada ida-ne’e, hanesan ezame ida tanba ha’u bele hakat liu ona hosi situasuan ne’ebé defisil.

Ho masakre Setembru Negro 1999 ida-ne’e, ha’u hanesan sobrevivente sente orgulu tanba Estadu rekuñese ona sira-ne’ebé mak fó an no sira-nia vida hodi hetan libertasaun ida-ne’e. Ha’u hodi vitima tomak nia naran, ha’u agradese.

Lia Tatoli

Tanba ne’e, iha komemorasaun loron konsulta popular ba dala-XXIII ne’e, ha’u hato’o ha’u-nia mensajen dahuluk ba joven sira no vitima masakre setembru negro, atu ita-boot sira-nia badaen atu hatene tuir istória no eroi hodi konsidera sira, rekuñese no valoriza sira ho sira-nia luta no terus ne’ebé sira hasoru mak joven sira goja iha rai ida-ne’e. Tau atensaun másimu ba ita-nia eroi sira, estudante sira hatene istoria Timor nian liu-liu istória Covalima nian.

Ha’u-nia mensajen ba Estadu Timor-Leste, iha loron 6 setembru 1999 nian, husu ba Estadu Timor-Leste tau atensaun ba loron ida-ne’e sai hanesan loron feriadu nasionál. Masakre Setembru Negro ne’e, ema mate hamutuk 130-resin inklui ho padre na’in-tolu fó an nia vida hodi liberta rai ida-ne’e. Estadu tenke konsidera, valoriza no dignifika sira, hodi tau loron 06 setembru ne’e hanesan loron feriadu nasionál iha Timor-Leste.

Notísia Relevante: Milísia ko’a-kanek ema-nia moen no kose halimar ho masin

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!