Covalima finaliza ona pagamentu PMOPA faze dahuluk iha fulan-agostu
COVALIMA, 07 setembrou 2022 (TATOLI)–Sekretáriu Administrasaun Munisípiu Covalima, Francisco de Jesus Alves hateten, Covalima finaliza ona halo pagamentu ba implementasaun Programa Mão de Obra Postu Administrativu (PMOPA) ba faze dahuluk iha fulan-agostu ne’e.
“Implementasaun Programa Mão de Obra Postu Administrativu (PMOPA) finaliza ona halo pagamentu faze dahuluk. Ami halo ona pagamentu ba trabaldór sira hanesan iha postu Fatululik halo pagamentu iha 26 agostu, postu sira seluk pagamentu antes ona nune’e pagamentu finaliza iha fulan agostu ne’e,” Francisco de Jesus alves relata ba jornalista sira, iha resintu Administrasaun Munisípiu Covalima, kuarta ne’e.
Nia dehan, implementasaun PMOPA di’ak tanba traballadór sira-ne’e maioria feto no envolve mós Ema ho Defisiénsia (EhD) sira, nune’e la hamosu diskriminasaun.
PMOPA ne’e halo rotasaun, iha balun loron lima no balun semana-ida troka fali traballadór sira seluk, ne’ebé traballadór sira-ne’e rekruta mai hosi suku no aldeia kada grupu ema na’in-25.
“Iha matadalan ne’e envolve mós ita-nia maluk feto sira-ne’e prióridade liu mós ba ema ho defisiénsia. Tanba, iha PMOPA nia matadalan mós fó oportunidade ba sira atu bele partisipa hotu, relasiona ho politika Governu nian katak labele husik ema ida iha kotuk maibé hotu-hotu kontribui no partisipa ativu iha prosesu dezenvolvimentu iha rai ida-ne’e,” nia dehan.
Enkuantu, iha Covalima hahú halo lansamentu implementasaun Program Mão de Obra Postu Administrativu (PMOPA) iha loron 01 fulan-agostu tinan ne’e.
Tanba bazea matadalan implementasaun programa Mão de Obra Postu Administrativu (PMOPA) katak faze dahuluk sira uza orsamentu 50% ekivalente ba númeru orsamentu 50.000-resin, ne’ebé kada postu administrativu ida aloka orsamentu rihun 100-resin, ho nune’e totál orsamentu implementasaun PMOPA iha postu administrative hitu (7) ne’e hamutuk $782.000.
Implementasaun PMOPA iha postu administrativu sira-ne’e prióridade ba halo manutensaun no hamos esgotu, halo manutensaun ba estrada, hamoos lixu iha fatin públiku tanba matadalan PMOPA ko’alia klaru katak labele halo konstrusaun foun.
Notísia Relevante: Covalima lansa PMOPA simultaneamente iha postu administrativu neen
Jornalista : Celestina Teles
Editór : Cancio Ximenes
