VIQUEQUE, 07 setembru 2022 (TATOLI)-–Diretora Estatístika munisípiu Viqueque, Maria Pascoela Campos, husu komunidade munisípiu Viqueque tomak partisipa sensu populasaun hodi kontribui ba proses dezenvolvimentu.
“Daudaun ne’e ita-nia sensu populasaun tinan 2022 hahú la’o ona. Tanba ne’e ha’u husu ba ita-nia komunidade hotu tenke partisipa másimu no hato’o informasaun loloos ba numeradór sira hodi kontribui ba prosesu dezenvolvimentu iha ita-nia rain,” Diretora Estatístika hateten iha ninia knaar fatin, Belio, Viqueque, kuarta ne’e.
Enumeradór sira hahú tama sai uma hodi halo sensu papulasaun sira iha suku 36 postu lima, iha munisípiu Viqueque.
“Ha’u haree atividade enumeradór ne’ebé koloka ba suku sira kuaze hotu la’o ho di’ak. Tanba sensu la’ós ona buat foun, maibé agora uza hotu sistema ho teknolojia diferente,” nia akresenta.
Notísia relevante: Sensu populasaun 2022 iha Dili adia ba loron 07 setembru
Atividade sensu poulasaun iha munisípiu Viqueque hahú loron 05 setembru no sei ramata iha 05 outubru 2022.
Tuir dadus, kolokasaun enumeradór no supervizór hamutuk 197, kompostu hosi postu administrativu Ossu Viqueque Vila 73, Uatucarbau 19, Uatulari 45, Lacluta 14 no Ossu 45, enkuantu dadus jerál supervizór 43 no enumeradór 154.
Dadus hosi sensu populasaun tinan 2015 munisípiu Viqueque ho totál populasaun hamutuk 76.033, kompostu hosi mane 38.131 no feto 37,902 no totál uma-kain 15.297.
Jornalista : Vitorino Lopes da Costa
Editora : Julia Chatarina
