DILI, 05 setembru 2022 (TATOLI)—Diresaun Jerál Estatístika (DGE, sigla postugés) hosi Ministériu Finansa (MF) realiza ona sensu populasaun 2022 nian hahú segunda ne’e, maibé ba munisípiu Dili adia ba loron 07 setembru.
“Sensu ne’e hahú iha loron 04 setembru to’o 5 outubru 2022, hakarak informa katak ita uza oras 23:59 (meia noite) sai baze ba realizasaun sensu uma-kain, maski ba halo entrevista populasaun sira iha loron tuir mai, maibé loron ne’e tau nafatin loron 04. Hahú ohin (segunda) iha munisípiu sira inklui Rejiaun Administrativa Espesiál Oé-cusse Ambeno (RAEOA) maibé iha Dili muda ba loron 07 setembru tanba sei simu Kardiál,” Diretór Ezekutivu Diresaun Jerál Estatístika, Élias dos Santos Ferreira, informa ba Agência Tatoli, iha ninia knaar fatin, segunda ne’e.
Maski Dili seidauk realiza maibé postu admnistrativu Metinaro hahú ona iha segunda ne’e.
“Hafoin haree atividade ne’ebé mak iha, sensu iha munisípiu la’o di’ak, maski mosu fallansu tékniku balun hanesan mapa tanba ne’e maka semana ne’e ami sei koloka tékniku espesialista ba munisípiu hotu hodi haree fallansu sira ne’e tanba uza sistema dijitalizasaun. Ein jerál la’o di’ak tanba entrevistadór sira asina ona kontratu, ligadu ba parte lojístika nian mós preparadu hanesan transporte sira mobiliza ona ba munisípiu,” nia akresenta.
Notísia relevante: PR husu públiku kontribui dadus loloos iha ámbitu sensu populasaun 2022
Ba kestaun ne’e, DGE koloka karreta ba kada munisípiu másimu haat no menus liu mak karreta rua.
“Bazeia ba informasaun ne’ebé ami simu dadeer ne’e, ekipa hotu hala’o serbisu ho di’ak no balun halo entrevista ona. Espera katak iha lorokraik, loron dahuluk ne’e uma-kain hirak mak enumeradór sira halo entrevista, hanesan ema tékniku iha esperiénsia katak loron dahuluk hahú entrevista ne’e kleur oitoan maibé hafoin liu tiha loron-rua sira familiár ona ho pergunta sira bele aselera ona,” nia tenik.
Sensu populasaun boot liu sensu agríkola, tanba ne’e pergunta utiliza iha sensu agríkola ne’e pergunta komplikadu liu maibé sensu populasaun ne’e pergunta liga liubá karaterístika uma-kain, edukasaun, saúde, no mortalidade, tanba sensu ida-ne’e sura mós populasaun ne’ebé iha rai-li’ur.
Iha sorin seluk, Diretór preokupa tanba durante sensu hala’o iha Dili sempre hasoru difikuldade tanba enumeradór sira uma barak mak odamatan taka tanba ba hotu serbisu, tanba ne’e maka sei aumenta tan loron.
DGE mós halo ona kontratu ho operadór telekomunikasaun Timor Telecom, Telkomcel, no Telemor atu haruka mensajen ba populasaun sira hotu atu partisipa sensu uma-kain no karik seidauk sensu bele komunika ba númeru telemovel ne’ebé sei fó sai hosi mensajen sira hodi nune’e enumeradór sira bele ba entrevista.
Programa ne’e envolve enumeradór hamutuk 2.384, supervizór 603, inklui publisidade, sekretariadu sensu munisípiu no nasionál, koordenadór postu administrativu hamutuk 3.424.
Jornalista : Antónia Gusmão
Editora : Julia Chatarina
