Governu aprova programa integra iha proposta OJE 2023
DILI, 07 setembru 2022 (TATOLI)—Ministru Finansa (MF), Rui Augusto Gomes, aprezenta projetu deliberasaun iha reuniaun Konsellu Ministru (KM), kuarta ne’e, kona-ba aprova programa ne’ebé integra iha proposta Orsamentu Jerál Estadu (OJE) 2023 ba servisu no entidade hotu hosi Administrasaun Sentrál Estadu, Seguransa Sosiál no Rejiaun Administrativa Espesiál Oé-cusse Ambeno (RAEOA) nian.
“Servisu no entidade administrasaun públika hamutuk 105 iha orsamentu prevee ona biliaun $2,8 hodi finansia programa oioin ne’ebé daudaun ne’e aprova. Enkuantu ba finansiamentu programa seguransa sosiál nian prevee ona millaun $235 no ba RAEOA nian hamutuk millaun $120,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu.
Notísia relevante: Governu aprova tetu agregadu OJE 2023 biliaun $1,8
Proposta OJE 2023 ne’ebé inklui Seguransa Sosiál, RAEOA no Fundu Kombatente Libertasaun Nasionál sei hetan valór hamutuk $3.155.715.306, enkuantu tetu agregadu OJE 2023 ba Administrasaun Sentrál ho montante biliaun $1,8
Orsamentu ne’ebé prevee ba Fundu Kombatente Libertasaun Nasionál ho alokasaun ba kuadru institusionál 33%, kapitál sosiál 35%, dezenvolvimentu ekonómiku 11%, dezenvolvimentu infraestrutura 18% no fundu kontinjénsia 3%.
Orsamentu ne’e sei uza hodi finansia programa 45 liuhosi atividades prinsipál 275, organizadu iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasaun internasionál no polítika esterna.
Jornalista : Antónia Gusmão
Editora : Julia Chatarina
