iklan

EDUKASAUN, HEADLINE

MEJD hahú distribui karteira eskolár 2.000 ba eskola 16 iha Dili

MEJD hahú distribui karteira eskolár 2.000 ba eskola 16 iha Dili

Ilustrasaun karteira eskolár. Imajen/Espesiál

DILI, 07 setembru 2022 (TATOLI)–Ministériu Edukasaun Juventude no Desportu (MEJD) liuhosi Diresaun Nasionál Patrimóniu Lojístika no Teknolojia (DNPLT) hahú distribui ona karteira eskolár (kadeira no meza) 2.000 ba eskola 16 iha munisípiu Dili, ne’ebé durante ne’e menus fasilidade iha sala aula.

“Ohin ita hahú halo ona distribuisaun kadeira no meza 2.000 ba eskola 16 iha Dili. Bainhira ita monta ona kadeira mak sei haruka ba eskola sira,” Diretór Nasionál Patrimóniu Lojístika no Teknolojia, Pedro Pinto dos Reis, informa iha ninia knaar fatin, Vila-Verde, kuarta ne’e.

Notísia relevante: MEJD sei distribui karteira eskolár 20.000 ba eskola sira tinan ne’e

Eskola ne’ebé hetan ona distribuisaun kadeira no meza ne’e kompostu hosi Eskola Edukasaun Pre-Eskolár (EPE) 01, Ensinu Báziku Filiál (EBF) 05, Ensinu Sekundáriu Jerál (ESJ) 05 no Ensinu Sekundáriu Tékniku Vokasionál (ESTV) ida.

Kuantidade distribuisaun iha kada eskola la hanesan, Eskola EPE hetan kadeira no meza 40, EBF 520, ESJ 400 no ESTV 60.

“Bainhira ita monta hotu ona mak foin distribui maibé ba munisípiu sira seluk ita haruka ba de’it, hafoin empreza ne’ebé hatama kadeira no meza mak ba monta atu nune’e bele prevene labele mosu fali estraga ruma ba mobiliáriu sira,” nia tenik.

MEJD sei halo distribuisaun uluk ba munisípiu sira iha rejiaun rai klaran no parte leste nian, enkuantu Dili nian hahú ona, hafoin kontinua ba Liquiçá, Ermera no Bobonaro.

“Bainhira munisípiu tolu ne’e ramata mak ba kedan Aileu, Bobonaro Manufahi no Covalima, ikus liu maka Manatuto, Baucau, Viqueque no Lautém. Fiar katak semana ida ne’e dadus jerál bele kompleta ona atu nune’e bele prepara tan mobiliáriu sira hodi halo distribuisaun ba eskola sira ne’ebé tama ona lista,” nia dehan.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!