MS planu sosa ambulánsia multifunsaun unidade 18 iha 2023
DILI,07 setembru 2022 (TATOLI)—Vise Ministru Saúde, Bonifacio Maucoli dos Reis, informa Ministériu Saúde sei sosa tan ambulánsia multifunsaun unidade 18.
“Tinan 2023, ita sei kompra tan ambulánsia multifunsaun unidade 18 atubele kompleta ba sentru saúde sira ne’ebé mak seidauk iha,” Vise Ministru Saúde Maucoli, hateten ba Agência TATOLI iha palasiu Governu, Kuarta ne’e.
Karreta ambulánsia iha sentrál no rejionál destaka hotu ona iha munisípiu sira, maibé postu saúde no sentru saúde sira presiza tan ambulánsia multifunsaun.
MS propoin millaun $3 iha Orsamentu Jerál Estadu (OJE) 2023 atu sosa ambulánsia multifunsaun hodi kompleta fasilidade saúde sira ne’ebé mak sei problema ho ambulánsia multifunsaun.
Alende ne’e, Vise Maucoli mós hateten, Ministériu Saúde planu tinan 2023 sei kria laboratóriu ida hodi teste ba ai-moruk nia kualidade hafoin halo distribuisaun ba fasilidade saúde sira iha territóriu nasionál.
“Ita nia polítika ne’e hakarak kria rasik ita nia laboratóriu rasik hanesan ho Indonézia, maibé SAMES hanesan instituisaun autonómu ida presiza investimentu finanseiru atu sosa mákina sira atu teste ai-moruk nia kualidade, hafin distribui ba fasilidade sáude,” Vise Maucoli afirma.
Iha OJE 2023, Ministériu Saúde sei haree atubele tau osan ruma hodi halo kompra ba ekipamentu di’ak atuhalo teste ai-moruk sira iha rai-laran.
“Orsamentu ne’ebé mak atu kria laboratóriu ne’e ita presiza osan boot, entaun tenke adisionál hodi apoia ba SAMES. Maibé depende ba Parlamentu Nasionál hodi halo aprovasaun atubele haree ba ida ne’e, tanbadaudaun sira kompra hela ekipamentu teste ba ai-moruk sira no la’ós ai-moruk de’it maibé ba mós item sira seluk,” nia afirma.
Governante ne’e esplika fatin ne’ebé mak atu kria laboratóriu ne’e sei harii iha Servisu Autonómu Medikamentu no Ekipamentu Saúde (SAMES) iha Kampu Alór atu teste ba ai-moruk inklui ba hahan sira ne’ebé importadu mai.
Daudaun, Governu liuhosi Ministru Saúde selebra akordu ho ho Laboratóriu Theopathetic Goods Australia atu teste kualidade ai-moruk.
Notísia relevante: MS define tipu ai-moruk lima bá teste kualidade iha Austrália
Jornalista : Felicidade Ximenes
Editór : Florencio Miranda Ximenes
