Top

Reuniaun CCF aprova dokumentu lima sei aprezenta iha kongresu dalimak

Adjuntu Sekretáriu Jerál FRETILIN, Flávio Maria Guterres da Silva. Imajen/Espesiál.

DILI, 07 setembru 2022 (TATOLI)—Reuniaun Comite Sentrál Fretilin (CCF) aprova ona dokumentu hamutuk lima ne’ebé sei aprezenta iha kongresu dalimak partidu RETILIN nian hodi diskute no deside.

Notísia Relevante: Apoiante Lere fiar delegadu sei aprezenta proposta revizaun ba estatutu FRETILIN

“Reuniaun Komite Sentrál Fretilin (CCF) ne’ebé hala’o iha loron 03-04 setembru ne’e, ne’ebé lidera direta hosi Prezidente Partidu no Sekretáriu Jerál FRETILIN hodi apresia no aprova dokumentu hanesan rejimentu ba kongresu dalimka, relatóriu CCF mandatu 2016-2022, manuál no programa polítiku, proposta revizaun estatutu, teze kongresu dalima no dokumentu sira-ne’e prepara hotu ona. Agora ami hahú distribui ba delegadu sira hodi diskute no deside iha kongresu dalimak,” Adjuntu Sekretáriu Jerál Partidu Fretilin, Flávio Maria Guterres da  Silva, informa ba Agéncia TATOLI iha kna’ar fatin  CCF, Comoro, kuarta ne’e.

Nune’e, molok kongresu ensera sei iha aprezentasaun no diskusaun ba aprovasaun rezolusaun no rezolusaun mosu depende ba dinámika diskusaun iha kongresu.

Ba revizaun estatutu partidu nian iha proposta ida diskute daudaun hanoin alterasaun iha artigu lubun no aditamentu ba maéeria sira hanesan oinsá tau estrutura órgaun   partidu sira-ne’e funsiona di’ak no kompeténsia estrutura balun, ho órgaun foun balun presiza harii hanesan konsellu konsultivu no líder partidu hodi fó mós biban ba maluk sira-ne’ebé hala’o funsaun Estadu nian bainhira mandatu ramata sira hatene katak Fretilin iha hela espasu hodi akomoda sira hotu.

Partidu FRETILIN hanoin atu hamoris fila-fali baze frientista signifika atu lori Fretilin ne’e fila-fali ba nia orijen tanba iha tempu naruk ne’e maluk sira balun iha frente armada, frente klandestina no diplomátika, loké espasu ida sira-nia misaun hotu sira hatene fatin Fretilin iha atu akomoda sira, nune’e iha nesesidade atu adita no alterasaun estatutu partidu.

“Maibé ne’e hanesan proposta Komite Sentrál Fretilin (CCF) nian ba kongresu tanba kongresu mak sei iha kompeténsia atu apresia diskusaun no atu halo aprovasaun,” nia dehan.

Hatán kona-ba,  revizaun estatutu liga ba diskusaun públiku nian  ba  Jenerál Reformadu, Lere Anan Timur, nia hateten, ida-ne’e direitu delegadu sira iha kongresu bele  hato’o proposta loke diskusaun, ho nia mekanizmu se iha proposta tama  pelumenus 10% hosi delegadu propoin proposta ida hetan apresiasaun depois se delegadu iha kongresu laran barak liu aseita, prontu simu bele diskute ba oin no ikus iha maiória delegadu sira aprova absoluta entaun sai hanesan dokumentu bele halo alterasaun ka revizaun ba estatutu.

“Naturalemente iha kongresu bele mosu tan proposta seluk, kongresu mak soberanu órgaun aas liu partidu nian, se mosu proposta signifika sei iha diskusaun depois kongresu deside se hotu-hotu aseita bele tama,” nia dehan.

Hatán kona-ba pakote hira mak sei kompete iha kongresu, Adjuntu Sekretáriu Jerál ne’e dehan kona-ba pakote rona informasaun mosu katak mosu iha pakote rua ka tolu maibé rejimentu klaru ona karak to’o loron kongresu mak iha biban atu aprezenta lista pakote depois loké apresiasaun hafoin sé mak eleitu ne’e desizaun kongresu loron dahuluk hatene kedas.

Enkuantu, kongresu dalimak partidu Fretilin nian sei realiza durante loron tolu 08-10 setembru ne’e iha Sentru Konvensaun Dili (CCD) no sei partsipa hosi delegadu hosi territóriu nasionál no delegadu sira iha direitu votu hamutuk 930 no suplente 67.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!